GAWAS nga nausab ang petsa sa iyang umaabot nga away, giilisan usab ang makontra ni Nonito “The Filipino Flash” Donaire.
Si Donaire gikatakda unta nga mosuway og langkat sa titulo ni World Boxing Council (WBC) bantaweight champion Nordine Ouabaali karong Disyembre didto sa Mohegan Sun Arena sa Uncasville, Connecticut.
Apan sigon sa taho sa BoxingScene.com, nga si Ouabaali adunay problema sa visa ug wa tugoti nga makabiyahi gikan sa France paingon ngadto sa United States.
Tungod niini, ang ikasangka ni Donaire (40-6, 26 KOs) si Emmanuel Rodriguez (19-1, 12KOs) ug kini adto na sa Disyembre 19 gikan sa Disyembre 12.
Hangtod ning pagsulat, wa pa mahibaw-i kon giaprobahan ba sa WBC nga himuong championship ang maong away. Kon ugaling tugotan nga usa ka title fight ang maong panagsangka, hayan ang modaog niini maoy moaway ni Oubaali (17-0, 12 KOs) alang sa title fight lang gihapon.
So, kon mao ni dagan sa senaryo, layo pa kaayo ang posibilidad nga mahitabo ang tinguha ni Japanese star ug undefeated fighter nga si Naoya Inoue (20-0, 17 KOs) kinsa mao karon ang naghupot sa WBA ug IBF world bantamweight title.
Sa niaging buwan, si Inoue human molampos sa pagdepensa sa iyang titulo pinaagi sa pag-knockout ni Jason Moloney sa Australia sa ikapito ka round, mipadayag nga gusto niyang ikasangka ang modaog sa Oubaali-Donaire fight alang sa unification bout.
Iya kining gipadayag bisan pa man og gihagit siya ni Filipino Word Boxing Organization (WBO) bantamweight king Johnriel Casimero alang sa unification fight.
Gipasumbingay ni Inoue nga dili lang una siya moaway ni Casimero sanglit iya unang hatagan og prayoridad ang WBC title. Pero hugot ang pagtuo ni Casimero nga nahadlok kaniya si Inoue.
Karon nga dili na mahinayon ang championship fight tali ni Oubaali ug Donaire, mapugos na lang ba kaha ang kampo ni Inoue pagdawat sa hagit ni Casimero alang sa unification fight?
Tan-aw nako mora og wala na may kalihayan si Inoue ning sitwasyona.
Kon mangita pa gani sila og laing rason, aw di na ko magduda. Tinuod gyud diay nga mikakak sila ni Casimero.
* * *
Matawag nga substitute o hulip man tuod kining Puerto Rican nga si Rodriguez apan dili angay mokompiyansa si Donaire niini. Gawas nga impresibo og record, mao usab kini ang kanhi naghupot sa International Boxing Federation (IBF) bantamweight title.
Gani ang bugtong nakapildi niini sa iyang professional fights mao lang si Inoue (20-0, 17 KOs) pinaagi sa second round knockout niadtong Mayo 2019 didto sa Glasgow, Scotland.
Anaa sa ikaupat nga puwesto karon si Rodriguez sa WBC rankings, tulo ka ang-ang nga ubos gikan sa no. 1 nga si Donaire.
Niadtong Nobiyembre sa niaging tuig, si Donaire gipildi usab ni Inoue pinaagi sa unanimous decision. Buot ipasabot nga silang duha pulos na diay biktima ni Inoue.
Nindot ni nga away. Walay nakalamang. Eksperiyensiyado man tuod ni si Donaire kon itandi ni Rodriquez pero dili kini makagarantiya sa iyang kadaugan kay duna man say ikabuga ang Puerto Rican warrior. (jun.migallen22@gmail.com)