BUSYNG-BUSY ang byuti ni Beauty Gonzales sa TV5 kay gawas sa matag Dominggo niyang series makita na usab ni nato matag gabii sa usa ka teleserye sunod semana.
Human sa “Kadenang Ginto” sa Kapamilya channel nga maoy nakapasikat og maayo sa aktres nidagsa ang iyang mga proyekto mapa-TV man o pelikula.
Gani sa pagbalhin ini sa TV5 karon ginuntan siguro ninyo ang matag Dominggo niyang romantic serye nga “I Got You.”
Dinhi maka-love triangle niya si Jane Oineza ngadto kang RK Bagatsing, kon kinsay makaangkon sa gugma ni RK mao nay inyong nuntan kon ang present ba o ang past?
Apan gawas diay niini, matutokan na usab nato ang Beauty matag gabii sugod karong Nobyembre 23 sa usa ka bag-ong teleserye.
Gikan sa Idea First production ug TV5 usa ka Paskohanong dalit nga teleserye ang “Paano Ang Pasko?”
Grabe sa pagka-daghang stars ang bida dinhi ang makauban ni Beauty sama nilang Maricel Laxa Pangilinan, Ricky Davao, Ejay Falcon, Julia Clarete, Devon Seron, Allan Paule ug uban pa.
Usa ka pampamilya nga drama nga puno sab sa maayong pagtulon-an ug haom panahon sa Pasko.
Gumikan ani malipayon ug mapasalamaton kaayo ang Beauty Gonzales sa dagan sa iyang career karon, Ay’g Saba!
* * *
Ngano sab gyud tang mga Pinoy nga mahiligon man kaayo sa mga salida nga hadlok-hadlok, ganahan kaayo ta nga kulbaan, makalitan ug mosyagit sa taman sa salida nga atong gitan-aw.
Bag-ohay pa gani tang nalingaw sa back-to-back horror flick nilang Jake Cuenca ug Ivana Alawi sa iWantTFC original nga “Sitsit” karon may lain na sab tang atangan sa Singko.
Sa iWantTFC original nga “Sitsit” sa titulo pa lang di buh kon sitsitan ka unya way tawo manlimbawot naman dayon imong balhibo.
Mao sab ni ang mahitabo sa padayong makita ninyo sa iWantTFC karon nga salida sa direksyon ni Ato Bautista ug Erin Pascual.
Sa episode nga “Scorpio” si Jake Cuenca ang bida nga nahimong monster sa maong sugilanon.
Sa episode usab nga “Aswang” ang sexy ug gwapang prosti dinhi nga si Ivana Alawi mao usab ang aswang.
Si Jake katapusan natong nakita sa “Love Lockdown” sa iWant samtang si Ivana sa seryeng “Sino Ang Maysala? Mea Culpa” sa miaging tuig.
Kon ganahan gyud mo og temang horror ania pay lain nga sugdan usab karon Nobyembre 23 sa gabii sa TV5, sa ulohan pa lang kinsay dili mahadlok sa “Kagat Ng Dilim” dinhi atong manuntan ang nagkadaiyang sugilanon nga mopatindog sa atong mga balhibo sa kahadlok.
Dinhi mga istorya sa mga nagkadaiyang urban legend ang makapaambak ug makapasyagit nato sa kahadlok uban sa mga banggiitang direktor nga silang Richard Somes, Rae Red, Lawrence Fajardo ug Paul Basinillo.
Hatod kanato sa TV5 ug gi-produce sa Viva Films ang “Kagat Ng Dilim” atangi sa sunod semana, Ay’g Saba!