GIABLIHAN na sa JM Poultry and Livestock Supply Inc. ang ilang ika-100 nga branch nga nahimutang sa Barangay Jubay, Liloan, Cebu sa Sabado, Nobiyembre 14, 2020.
Gipasiugdahan ang ribbon cutting sa branch ni Dr. Avelino De Manuel, chairman sa JM Poultry and Livestock Inc., kinsa nagsaulog sab sa kasumaran sa iyang adlawng natawhan.
Nasugod ang JM Poultry and Livestock Inc. 36 ka tuig na ang milabay sa mission nga motabang sa mga magbuhi og baboy ug manok.
Isip usa ka veterinarian, matod ni De Mauel nga nasayod siya sa mga problema sa mga magbuhi og baboy ug manok.
Mao kini ang hinungdan nga gitukod niya ang negusyo aron mo-supply og good quality product.
Sa pag-abli sa ika-100 nga mga branch, matod ni De Manuel nga pinaagi niini makahatag sila sa ilang mga produkto sa lain-laing lugar sa nasod.
Gani, matod ni De Manuel nga sagad sa ilang mga branch anaa sa Visayas ug Mindanao ug aduna sab silay pipila ka mga branch sa Bulacan.
Apan tungod sa pagbutho sa African Swine Flu (ASF) sa Luzon, naapektuhan sab ilang negosyo, apan padayon pa gihapon sila sa pag-survive kon nasundan na sab kini sa Covid-19.
Nipaambit sab si De Manuel nga 75 ngadto sa 80 porsyento sa ilang halin sa ilang mga tindahan gikan sa ilang mga feeds labi na ang ilang kaugalingong brand sa feeds, ang Unifeeds.
Gisiguro sab nilang De Manuel nga ang ilang mga baligya barato ug good quality alang sa ilang mga kustomer.
Kini tungod kay nabantayan sab nila nga ang pagbuhi og baboy ug manok dili na panglingaw-lingaw, apan ginegosyo na kini labi na karong panahon sa pandemic.
Sa laing bahin, karong panahon sa pandemya, matod ni De Manuel nga naapektuhan sab ang ilang negosyo labi na nga aduna silay mga tindahan nga temporaryong nasirado human ang kapamilya sa ilang mga empleyado nagpositibo sa Covid-19.
Matod niya nga usa ka dakong investment nila ang ilang empleyado hinungdan nga ila kining pinanggaon labi na karon panahona.
Gisiguro nila ang kaluwasan sa ilang mga empleyado alang sab sa kaluwasan sa ilang mga kustomer.
Matod ni De Manuel nga tanan nilang mga tindahan nituman sa mga sumbanan nga giimplementar sa gobiyerno. (KFD)