SUKWAHI sa ubang mga local government unit (LGU), nahiusahan sa Lungsod sa Daanbantayan nga itugot ang pagpanaygon sa lungsod.
Kini maoy gipahibawo ni Daanbantayan Mayor Sun Shimura sa Superbalita Cebu sa Nobiyembre 12 pinaagi sa tawag sa cell phone.
Matod sa mayor nga aron mabatyagan gihapon sa iyang mga konstituente ang diwa sa Pasko taliwa sa nasinati nga krisis, nahiusahan sa Sangguniang Bayan ug local Inter-Agency Task Force (IATF) nga itugot kini, apan kihanglan mosunod sa estriktong protocol. Ang pagpanaygon nalakip na sa tradisyon sa mga Pinoy matag Pasko.
Gani, sayo sa Nobyembre human sa Kalag-Kalag, mabantayan na ang mga manaygonay sa kadalanan ug kabalayan.
Ang lungsod sa Daanbantayan nga nahisakop sa Probinsya sa Sugbo napaubos gihapon sa modified general community quarantine (MGCQ) status.
Tungod kay anaa pa sa pandemya ang nasud, gikinahanglan nga mosubay gihapon sa estriktong health protocol ang tanan nga manaygon sa lungsod.
Aron mas dali ang pag monitor sa mga manaygon, kinahanglan nga molukat kini og barangay clearance aron masiguro sa barangay nga way manaygon nga batan-on o tiguwang nga gidili pa sa IATF sa paggawas sa balay.
“Kaning mag caroling, kinahanglan sila mokuha og barangay clearance sa whole duration nga mag- caroling sila. So, adto sila sa barangay. They will get barangay clearance and we will also allow them of course sa essence lang gyud sa Christmas. So, that naa gyud bitaw kon pila ang gidaghanon,” matod ni Shimura. (ANV)