MOABOT sa 125 ka mga tawo ang nadakpan niadtong Biyernes sa gabii, Nobiyembre 13, ngadto sa Sabado sa kaadlawon, Nobiyembre 14, sa dungan ug sunodsunod nga operation sa Cebu City Police Office (CCPO) ug Prevention, Restoration, Order, Beautification and Enhancement (Probe) team dihang gipatuman ang “Oplan Bulabog” lukop siyudad.
Ang tanang 11 ka mga police station ubos sa CCPO, uban sa mga sakop sa Probe minglusad sa operasyon human momando si Cebu City Mayor Edgardo Labella sa paghingusog sa pagpatuman sa mga health protocol.
Ang lakang gihimo human mosaka ang gidaghanon sa mga kaso sa Covid-19 sa milabay nga mga adlaw.
Ang operasyon sa CCPO ubos sa direktiba ni Police Colonel Josefino Ligan, pangu sa kapulisan sa dakbayan.
Mga kalapasan sa IATF guidelines maoy kasagaran nahimo sa mga nadakpan.
Gawas sa 125 ka mga tawo, moabot usab sa 66 ka mga establisemento ang gisusi sa mga pulis.
Labing daghan nga mga tawo ang nadakpan sa Guadalupe Police Station nga moabot sa 23 ug gisundan sa Pardo Police Station nga moabot sa 17 ka tawo, Samtang 16 ka mga tawo ang nadakpan sa Mambaling Police Station.
Si Ligan nibutyag nga ang mga kalapasan may labot na sa wala pag sul-ob og face mask ug wa motuman sa social distancing.
Atol sa paglibot ni Ligan, iyang kauban mga sakop sa Business Permit Licensing Office (BPLO) personnel, Probe ug Kasambagan Barangay Captain Franklin Ong nga usa mihimo og lakang sa pagpangayo og pakitabang sa iyang nasakupan nga dunay mga negosyo tungod sa wa pagsunod sa mga guideline sa IATF.
Si Ong nga nahinabi sa Superbalita Cebu Facebook Llive nibutyag nga wa sila magkuwang sa pagpamadlong sa mga establisemento, apan dunay gahi og ulo. “Nagsige na ta og pamadlong ana nila apan di gyud maminaw. Hinungdan nga nangayo ta og tabang sa atong mga kapulisan,” sulti ni Ong sa Superbalita Cebu.
Si Terenz Saavedra, deputy chief sa BPLO sa Dakbayan, niingon nga ilang gipang-isyuhan og show cause order kadtong mga tindahan o kan-anan nga nag-serve og mga ilimnong makahubog nga wa motuman sa IATF.
Sila gimanduan nga motubag sulod sa 72 oras sa ilang rason.
Samtang duna usay establisemento nga nabulabog human nga nasuta nga nag-operate samtang wa pay permit.