BISAN wa mapadlak sa selda sa kapolisan human nakapiyansa ang brodkaster sa Davao City nga si Junior “Jun” Ortiz Digamon,, nagpaguwa gihapon og pahayag ang National Union of Journalists of the Philippines (NUJP)-Davao Chapter nga makaalarma ang maong hitabo.
Kahibaloang gisikop sa mga sakop sa Criminal Investigation and Detection Group (CIDG)-Davao del Sur si Digamon niadtong Biyernes sa udto, Nobyembre 13, 2020.
Si Digamon, gikasohan og cyber libel sa tagduma sa usa ka sikat nga ospital sa Siyudad sa Digos human niini gibatikos sa iyang social media account dihang nagpatabang kanila ang usa ka pasyente nga di pagawason kay way pambayad sa billing.
Pila ka oras human gisikop, nakapiyansa gilayon sa kantidad nga P10,000 si Digamon sa buhatan sa Davao del Sur Provincial Prosecutor's Office alang sa iyang temporaryong kagawasan.
Sa spot report sa kapulisan, nasayran nga ang Regional Trial Court (RTC) Branch 18 ang nipaguwa sa warrant of arrest ni Digamon ug gilagdaan ni Presiding Judge Marivic Trabajo-Daray niadtong Oktubre 23.
Gihimo sa CIDG ang "Oplan Pagtugis" sa istasyon mismo sa Brigada News FM Davao sa dalang McArthur Highway, Ulas, Barangay Talomo Proper, Siyudad sa Davao.
Una nakapyansa, gikuhaan sab og mugshot ang broadcaster alang sa dokumentasyon sa iyang kaso.
Gitataw sa NUJP-Davao Chapter nga bisan pa man og grabe ang mga komentaryo ni Digamom sa kahanginan ug social media, dili gihapon angayang mahisakop kini sa maong balaod.
Si Digamon ang ikaduhang media worker sa Mindanao nga giaresto sa miaging semana human nasikop sab ang Surigao broadkaster nga si Leonardo Hijara niadtong Nobyembre 11.
“The Cybercrime Prevention Act of 2012 has restricted the space of free expression and free press, which is vital to keep power in check. We intensify the call to revisit the country’s libel laws, which we members of the press and rights advocates find to be excessive, outdated and prone to abuse,” ang pahayag sa NUJP.