NIADTONG tuig 2006, si anhing Kobe Bryant mipakurat sa tibuok kalibutan sa dihang mimugna siya og 81 puntos aron aswaton ang Los Angeles Lakers batok sa Toronto Raptors, 122-104, didto mismo sa ilang korte sa Staples Center sa Los Angeles, California. Ang 81 puntos ni Bryant maoy ikaduha sa pinakataas nga scoring output sa usa ka NBA player, sunod lamang sa 100 puntos ni Wilt Chamberlain niadtong Marso 2, 1962 didto sa Hershey Sports Arena. Gibuhat ni Chamberlain ang iyang 100 puntos sa dihang gilupig sa iyang team nga Philadelphia Warriors ang New York Knics, 169-147. Apan walay videotape ang maong duwa ug ang 4,124 fans lamang nga anaa sa arena ang nakakita niini. Mao nga ang 81 puntos ni Bryant maoy pinakataas nga nabuhat sa NBA player nga na-record sa videotape ug nakita sa telebisyon. Si Bryant miretiro sa 2016 nga adunay lima ka titulo sa Los Angeles Lakers, nahimo pud siyang four-time All-Star MVP, two-time NBA Finals MVP, Slamdunk champion, NBA Most Valuable Player ug scoring champion. Namatay si Bryant niadtong Enero 26, 2020 sa edad nga 41 sa usa ka helicopter crash didto sa Calabasas, California. (RSC)