GIHAKOP sa kabalaka ang mga negosyante sa warning ni Cebu City Councilor Joel Garganera, hepe sa Emergency Operations Center (EOC), niadtong Nobiyembre 12, 2020, nga hayan ibalik sa istrikto nga lockdown ang siyudad tungod sa pagsaka sa mga kaso sa Covid-19.
Si Rey Calooy, chairman sa Filipino-Cebuano Business Club (FilCeb), niingon nga angay susihon sa lokal nga kagamhanan kon gikinahanglan ba ang usa ka lockdown subay sa ebidensiya ug science, ilabi na nga anaa kita sa economic recession. Dakong babag sa economic recovery ang lockdown, matod niya.
Apan alang ni Garganera, di na kinahanglan pang magpili ang gobyerno tali sa panginabuhi ug kinabuhi. Ang angay tingaling tan-awon sa nagdumala sa mga kalihokan batok sa Covid-19 kon giunsa pagkontrolar sa Taiwan ang Covid-19 bisan way lockdown.
* * *
Morag way laing nakat-onan ang atong mga opisyales gawas sa lockdown. Hinuon, warning ra tong kang Garganera, pahimangno sa katawhan nga kon di sila magmatngon, kon di sila mosubay sa health protocols, mahitabo ang lockdown.
Modalikyat kita paghisgot sa Taiwan. Sud sa kapin na sa 200 ka adlaw, way local transmission sa coronavirus sa Taiwan, sumala pa sa cnn.com. Sukad sa pagsugod sa pandemic, wa gyud mopatuman og lockdown ang Taiwan.
Si kanhi Taiwanese Vice President Chen Chien-jen, usa ka epidemiologist, niingon nga di ideal ang lockdown aron pagkontrolar sa Covid-19. Ang mahinungdanon mao ang contact tracing ug istriktong kuwarentina sa mga tawo nga nakahimamat sa usa ka tawong positibo sa coronavirus.
* * *
Si Cebu City Mayor Edgardo Labella niingon nga ang mayor, siya na, maoy dunay “final say,” ang katapusang mohukom, kon ipatuman ba ang usa ka lockdown, ubos sa rekomendasyon sa Department of Health ug sa Cebu City Health Department ingon man sa law enforcement agencies. Bisan kinsa, matod niya, mahimong mopahayag bahin sa lockdown, apan ang mayor maoy magbuot. Ug kon dunay lockdown nga ipatuman, granular lockdown ang ipatuman nga nakatutok sa balay, compound o sitio nga dunay Covid-19 transmission.
Ang mahinungdanon nga motuman kita sa health protocols sama sa pagsul-ob og face mask, social distancing ug ang kanunay nga paghugas sa kamot. Usa ka kongresista niingon nga dunay nireklamo niya sa pag-ingon. “Congressman, lima ka buwan na kong sigeg hugas sa kamot. Kanus-a pa man ko maligo.”