USA ka 17 anyos nga lalake ang nalandig sa tambalanan niadtong Sabado sa gabii, Nobiyembre 14, human nahulogan sa usa ka tawo gikan sa ikaduhang andana sa usa ka boarding house sa dan Lapu-Lapu sa Barangay San Roque, siyudad sa Sugbo.
Si San Roque Barangay Councilor Duke Espina nga nahinabi sa Superbalita Cebu miingon nga ang maong minor de edad igo ra naglingkod dinha duol sa hagdanan sa maong boarding house nga natunong sa bintana diin nahulog ang maong tawo.
Nasayran ni Espina nga ang duha ka mga construction worker nga sila si Eduardo Andale, 48, molupyo sa Barangay Looc, siyudad sa andaue ug Arnold Morante, 30, taga Barangay Guadalupe, siyudad sa Sugbo,
Nag-inom sa second floor sa boarding house hangtud nga naglalis ang duha sa wala matino nga rason. Giingong nagsinumbagay sila si Andales ug Morante nga miresulta sa pagkahulog sa usa kanila.
Sa barangay hall gipangdala ang duha aron makuhaan og mga pangalan sa wala pa gidala sa Waterfront Police Station aron itanggong una samtang wala pa mahusay ang bayrunon sa pagpaospital sa 17 anyos nga napagan sa panag-sumbagay sa duha.
Sa barangay hall, ang duha gipangutana kon unsay sinugdanan sa ilang panag-away. Si Morante nipasangil kang Andales nga siya gituklod niini ug miresulta sa pagkahulog sa ubos nga bahin gikan sa ikaduhang andana nga didto miigo sa minor de edad nga lalaki.
Ang 17 anyos luwas na hinuon apan di makabarog nunot na sa gikusgon nga pagkaigo niini sa natagak nga si Morante.
Si Morante sa iyang pagtuo kon wala pa kini nahulog paingon sa batan-on patay na unta siya kon didto nalahos sa semento.
Apan si Andales nihimakak nga iyang gitukmod si Morante gani natingala kini sa pagkahulog sa iyang kauban sa iyang pagduol.
Sa iya pangangkon siya pa ang nabun-og human nga sa pagkatagak ni Morante gibalikan kini ug gikulata ni Morante. (BBT)