WALAY kausaban sa kasamtangang sitwasyon sa borders sa lalawigan sa Sugbo.
Kini maoy giklaro ni Cebu Governor Gwendolyn Garcia kagahapon, Nobiyembre 15, subay sa kabalaka sa mga taga probinsya sa Sugbo sa pagpahugot sa border control sa dakbayan sa Sugbo.
Tungod sa kamandoan sa siyudad sa Sugbo, giawhag ni Garcia sa pagpagawas og mas piho nga lagda alang sa mga empleyado gikan sa probinsya aron kalikayan ang kalibog.
“I just hope that they will be very, very specific. What do they do about workers coming from the province that the business establishments in the City of Cebu need. Are they allowing them passage? Is there a procedure by which it will distinguish exaclty who are allowed and who are not allowed?” matod sa gobernador.
Sa kasamtangan, gilibkas na sa probinsya ang estriktong border control aron mas sayon alang sa mga turista ug residente ang pagtabok sa isla ug makasuroy sa tourist destinations ubos sa modified general community quarantine (MGCQ).
Matod ni Garcia, may katungod usab ang siyudad sa pagpanalipod sa ilang lugar gumikan sa nakitang pagsaka sa mga positibong kaso sa coronavirus disease 2019 (Covid-19).
“If the city chooses to institute that border control, well I thanked them for that kay by doing that they will in fact save us from trouble and by so doing will protect the Province from the as the Mayor said the rising number of Covid-19 cases in the city,” matod ni Garcia.
Dugang ni Garcia nga una na nga mipatuman ang probinsya sa hugot nga border control nga gisegundahan sa estriktong pagbiyahe sa mga taga probinsya.
Kaniadto, kinahanglan pa kining mokuha og travel pass aron masiguro nga importante lang ang tuyo sa siyudad.
Subay sa uwahing datos sa probinsya sa Nobiyembre 14, moabot sa 6,549 ang natala nga mga kaso sa probinsya. May 5,853 nga naka-recover hinungdan nga anaa nalang sa 299 ang mga aktibong kaso niini.
“So with the very high recovery rate that we have seen both province and in the city of Cebu, we believe that as we analyze, we must not go back to the very very strict restriction that badly damaged, that ravaged the economy,” matod ni Garcia.
ECQ ibalik?
Ang dakbayan sa Sugbo ubos sa mas luag nga MGCQ apan ipatuman sugod karon sa dakbayan ang pag-estrikto og balik sa protocol sa panglawas susama sa kanhi enhanced community quarantine (ECQ).
Mao kini ang gibutyag ni Police Lieutenant Colonel Wilbert Parilla, deputy city director sa Cebu City Police Office (CCPO).
Apan hugot niyang gihimakak ang hugonhugon nga mag-lockdown sila sa tanang border control points tungod kay ang ilang himuon mao ang pagsusi sa publikong mga sakyanan kon ang mosulod sa siyudad mga authorized persons outside residence (Apor).
Iyang gipasabot nga mahimo ra nga makasulod ang taga probinsya sa Sugbo sa dakbayan sa Sugbo kon sila mga trabahante lakip na kadtong essential.
Mahimong mopakita sa certificate of employment ug identification ang taga probinsya sanglit giila man usab nga Apor ang mga trabahante.
Sa pangutana kon mahimo bang makasulod ang taga lungsod sa siyudad sa Sugbo bisan dili sila trabahante, matod ni Parilla, nga mahimo ra basta aduna silay quarantine pass.
“Ang atong pagbalik sa pagpahigpit sa quarantine protocols para usab sa measures labi na nga misaka ang nag-positive sa Covid. Ato nasad higpitan pagbalik kay nakita nato nga duna nay medyo mi-relax tag gamay,” matod ni Parilla.
Dugang niya nga ang kapulisan sa siyudad mo-roving na sa kabarangayan uban ang Task Force Kasaligan aron ipatuman ang minimum health standard sama sa pagsul-ob kanunay sa face mask ug face shield.
Hugot nga idili ang mga panagtapok sa kabarangayan nga una nang nabantayan nga daw sa wala na mahadlok sa Covid-19.