KAGAHAPON sa hapon gipahigayon ni Mayor Inday Sara ang gitawag nga State of the City Address (Soca). Tungod lagi kay sayo man nasulat kining atong kulom, wa na nako masubay ang iyang gibutyag sa Soca.
Gibuhat kini sa mayor aron masayran sa tanan ang sakto nga impormasyon kabahin sa nagpadayong bugno sa coronavirus disease 2019 (Covid-19) nga daw walay nakitang hinanaling paghunong.
Ang akong nasayran nga posibleng mobalik na usab ang enhanced community quarantine (ECQ) tungod sa kapaspas sa pagkuyanap sa maong pandemya. Nakigtigi ang Davao sa ihap sa daghang natakdan sa kaulohan busa nagbuhat na’g bag-og kasuguan ang atong mayor nga mobalik na usab kita sa estriktong pagpatuman sa kurentinas.
Ang kadaghanan kanato nangita na kung asa gibutang ang karaang Food and Medicine (FM) Pass kay abi’g goodbye na sa Covid-19. Niadtong ika-10 sa Nobyembre, nagpagawas ang Davao City Covid-19 Task Force nga gipangulohan ni Mayor Inday og Resolution No. 1, Series of 2020 nga “A Resolution Requesting the Regional Inter-Agency Task Force-XI (RIATF) to Declare Davao City as a Restricted Local Government Unit (LGU).”
Kahibalo kita nga bisan si Mayor Inday Sara, ang nangulo sa RIATF, kinahanglan gihapon niya ang pagtugot sa tibuok task force aron mas lig-on unya ang pagpatuman niini sa atong syudad.
Subay sa maong resolusyon nga napugos ang Davao City sa paghangyo sa RIATF tungod sa pagtaas sa ihap sa natakdan human napailawom ang syudad sa modified general community quarantine (MGCQ) kay daghan na mang gitugtan nga kalihukan.
Gawas pa, nitaas ang gidaghanon sa pasyente nga di na masulod sa kapasidad sa Southern Philippines Medical Center ug uban pang pinasahing pasilidad alang sa natakdan sa maong virus. Busa gusto sa lokal nga kagamhanan nga paminusan na usab ang gidaghanon sa tawo nga naglibot-suroy bisan way hinungdan sa pagdili kanila sa pagbiyahe sugod karong adlawa hangtod sa Disyembre 31, 2020.
Ubos sa “Restricted LGU” nga kategoriya, pwede lang nga makabiyahe ang cargo trucks o sakyanan nga nagdala’g agricultural og dili agricultural nga produkto sa dili molapas og lima ka tawo. Pwede lang mosulod sab ang mga authorized persons outside residence (Apor) sama sa health workers og frontliners, mga opisyal og kawani sa gobyerno, mga awtorisadong nagdala’g humanitarian nga tabang, og kadtong nagtrabaho ug nipadulong o nibalik sa panimalay.
Ubay-ubay sab ang resikitos aron makalabang sa checkpoint sama sa food and medicine (FM) pass, employment identification card, quick response (QR) code, travel order, tickets, reverse transcription-polymerase chain reaction (RT-PCR) results ilabi na sa nagbiyahe ug layo. Dili ta magbaliwala niining mga pahimangno sa gobyerno kay alang ra gayod kini sa atong kaayohan.
Gusto man kaha natong dili magmosketiro og tabla nan mosunod na lang ta. Wa nay kabutangan sa mga masakiton sa hospital. Hasta ang morgue hastang punoa sa minatay nga naghulat sa ilang mga paryente nga mokuha aron sunugon.
Ang akong namatay nga kaila nga sikat nga magsisibya sa radyo sobra duha ka semana una nakuha sa morgue ug gi-cremate kay ang iyang asawa ug mga anak natakdan man sab og nagkuwarantinas. Balik ECQ na lang ta bai!