SUPERBALITA CEBU

Espinoza: Dakop gyud aron motuman!

Nagpakabana

STRIKTO. Naghisgot ko sa akong lindog sa SunStar Cebu niadtong Miyerkules sa posibilidad nga dunay subli nga pagsaka sa takod sa Covid-19 tungod sa akong mga nasaksihan nga kumpiyansa na kaayo ang kadaghanan sa katawhan, dili lang dinhi sa dakbayan sa Sugbo, apan lakip na ang tibuok probinsya tungod sa kakuwang sa pagpatuman sa minimum health protocols.

Ang akong pangagpas basi akong nakita nga mga tawo nga magpundok ug nagtabi nga walay facemask, mga batan-on nga nagduwa og basketball nga walay mask ug sapot, mga nangaon sa restaurant nga sikit ang mga lingkoranan, mga naninda sa tiyangge ug mga sari-sari store nga ang tindera/tindero, nga morag gisakitan og ngipon kay ang facemask kutob ra sa ilang suwang, ug mga bata sa kadalanan nga mangayo’g pinaskohan sa mga motorista.

Si Konsehal Joel Garganera, deputy chief implementer sa Cebu City Emergency Operations Center (EOC), nagbahad nga ibalik sa ECQ (enhanced community quarantine) ang dakbayan tungod sa kalit nga pagsaka sa mga kaso sa Covid-19. Basi sa taho sa Department of Health (DOH-7), Region 7 niadtong Sabado, dunay 59 nga bag-o nga natakdan ug misaka sa 262 ang aktibo nga kaso. Sa 59 nga naigo sa virus, 30 mga lalake ug 29 mga babaye, lakip ang upat ka mga bata.

Agi’g pagtabang sa atong kagamhanan, kanunay ko magpahinumdum sa atong mga opisyal pinaagi sa akong mga lindog nganong huyang ang dakop sa mga dili motuman sa minimum health protocols. Kami si Torni Frank ug Titus Borromeo pinaagi sa among radio program “Frankahay Ta” sa dyCM pirmi usab mi magpahimangno sa atong kaigsuonan nga mosunod sa minimum health protocol kay nia pa ang Covid-19.

Tungod kay misaka og balik ang kaso sa Covid-19, estriktohon na sad sa dakbayan sa Sugbo ang paggamit sa quarantine pass ug number coding sa mga sakyanan gawas sa mga tawo nga nagtrabaho ug ang mga APOR (authorized persons outside of residence). Sa dihang miubos ang kaso sa Covid-19 ug nanaug sa modified general community quarantine (MGCQ) ang estado sa dakbayan sa Sugbo, daghan nga mga tawo ang nanggawas ang uban nagsuroy-suroy sa mga dapit nga adtoanan sa mga turista.

Niadtong Bernes, Nov. 13, gipapauli sa kapulisan ang mga nag-inom sa usa ka restobar, nga wala motuman sa social distancing. Ang tag-iya sa tindahan masekwate sa wala pagtuman sa health protocols. Ang Probe (Prevention, Restoration, Order, Beautification and Enhancement) team sa dakbayan sa Sugbo dunay nasikop nga 125 ka tawo tungod kay nakasupak sa kwarentinas ingon man sa curfew.

Hinuon, dili pa uwahi ang tanan nga strikto nga ipatuman sa mga lokal nga kagamhanan ang minimum health protocol.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph