WALA na igkita ang usa ka 34-anyos nga lalake nga giingong naligo sa dagat sa Sitio Toril, Barangay Canjulao, Dakbayan sa Lapu-Lapu niadtong Dominggo, Nobiyembre 15, alas 3 sa hapon.
Gidudahang nalumos si Larry Suan Boltron.
Apan ang gikahibudngan sa maguwang nga si Jelalyn Boltron nga wala kini molutaw human sa sobra na sa usa ka adlaw.
Matod ni Jelalyn nga katapusang nakit-an ang iyang igsuon nga nagkomedya sa iyang mga higala nga kamao kini mosawom sa dagat.
Apan human kini misawom sa dagat wala na kini igkita pa pagbalik sa iyang mga higala.
“Nisawom kuno siya unya nangatawa ang iyang mga kauban kay taas lage siya ug utong kuno mao to pagwala na siya mopatim-aw niana sila taasa gud utong ni Kuya Larry mao na to wala na siya makit-i,” mayod ni Jelalyn.
Gibutyag ni Jelalyn imposible sad ug napantok sa bato ang iyang igsuon sanglit wala may bato sa dapit diin kini misawom.
Gani ang higala niini nga misuway ug pangita maoy nasamad sa bato sa iyang pagsawom sa dagat.
Makamao usab ang iyang igsuon molangoy sanglit lumad sila nga taga isla.
Naglaom si Jelalyn nga buhi pa ang iyang manghod.
Awhag niya sa mga adunay makit-ang lalake nga mapadpad sa ilang lugar sa pagkontak gilayon kaniya sa 0945-3507992.
“Ambot lang lage ani unsa to wala gyud mi idea ani Nobiyembre 15 pa mi nangita ani uban ang Coast Guard,” matod ni Jelalyn sa pangutana kung posibleng buhi pa kini. (GCM)