NAGNEGATIBO sa drug test ang 100 ka mga piniriso atol sa gipahigayong surprise random drug testing sa Mandaue City Jail atol sa pagsaulog sa Drug Abuse Prevention and Control (DAPC) Week niadtong Nobiyembre 16, 2020.
Sa 1,600 ka mga piniriso sa male dormitory, random nga gipili ang 50 kabuok aron ipaubos sa drug test.
Samtang, laing 50 ka mga piniriso sa female dormitory sab ang gipaubos sa drug test, gawas sa 160 ka mga piniriso.
Sa pakighinabi sa Superbalita Cebu ni Mandaue City Councilor Nerissa Soon-Ruiz, ang pangu sa City Anti-Drug Abuse Council (Cadac), niingon siya nga ang ilang pagpili dili kini aron sa paghusga sa mga piniriso apan random lang ilang gipaubos sa drug test.
Sigon ni Ruiz nga ang maong kalihokan usa sa mga requirement aron madeklara sa dakbayan sa Mandaue nga drug-free na ang pasilidad.
Sa laing pakighinabi, sigon ni JSupt. Gil Inopia, ang warden sa Mandaue City Jail, niingon nga ang kalihokan makatabang sa ilang pasilidad aron ma-monitor ang ilang mga piniriso.
Matod ni Inopia nga kung adunay magpositibo sa maong drug test ila kining susihon kung nganong nagpositibo.
Human niini, ipahibawo kini ngadto sa korte aron kung mu-avail sa plea bargaining, ipa-rehab una ang maong piniriso isip dugang silot niini.
Dakong pasalamat ni Inopia sa dakbayan nga nakapahigayon sila og drug testing tungod sama niya nga dili tanang jail facility ang mahatagan og regular nga drug testing kits. (KFD)