3 ka taxi gidaro sa SUV; 3 angol

GIDARO: Nagkatag atubangan sa compound sa Department of Health (DOH) Osmeña Boulevard, Dakbayan sa Sugbo ang tulo ka mga taxi ug ang usa ka sports utility vehicle (SUV) nga midaro niini sa Lunes sa kaadlawon, Nobiyembre 16, 2020. Tulo ang angol sa bangga, apan ang drayber sa SUV wa maunsa. (Benjie B. Talisic)
GIDARO: Nagkatag atubangan sa compound sa Department of Health (DOH) Osmeña Boulevard, Dakbayan sa Sugbo ang tulo ka mga taxi ug ang usa ka sports utility vehicle (SUV) nga midaro niini sa Lunes sa kaadlawon, Nobiyembre 16, 2020. Tulo ang angol sa bangga, apan ang drayber sa SUV wa maunsa. (Benjie B. Talisic)

“GRABE ang paningkamot sa akong papa para lang makakaon mi. Nagsugod na og tigom ang akong para makaeskwela ang akong maguwang sa college,” social media post ni JL Rabosa Mamolo, anak ni Roberto Mamolo, 54, usa sa tulo ka mga driver sa taxi nga nangaangol human daruha sa SUV nga gimaneho sa usa ka 23 anyos nga lalakeng gituohang hubog.

Sila si Mamolo ug tulo ka kaubang mga driver nangatulog atubangan sa compound sa Department of Health (DOH) 7 sa Osmeña Boulevard, Dakbayan sa Sugbo samtang naghuwat og pasahero dihang gipangdaro sa Toyota Fortuner nga gimaneho ni Carl Cosme Dela Cerna, 23, kinsa wa maunsa bisan nalimbuwad ang iyang gimaneho.

Si Dela Cerna, taga St. Jude Acres, Bulacao, Dakbayan sa Sugbo giingong hubog ug niangkong nakatulog samtang nagmaneho.

Matod ni JL nga ang iyang amahan nipugos og drive bisan bag-o lang kini nadisgrasya sa motorsiklo ug dunay blood clot sa ulo kay mao ray gisaligan sa ilang pamilya.

“Ni-duty jud na para lang naay ikagasto namo. Nasamotan pa jud aning pandemya. Lisod kaayo unta. Mag drive mo ayaw mo pangamong sa tawo naningkamot. Ug unta makainom mo, og dili kaya mag-drive, pahuway mo kay daghan kaayo maangin nga tawo,” dugang ni JL.

Sa iyang pag post, wa pa sila masayod sa kahimtang sa ilang amahan.

Laing nangaangol giila ni ni Patrolman William Fabilliar sa Traffic Patrol Group (TPG) sa Cebu City Police Office (CCPO) nga sila si Rolando Pragele, 48, taga lungsod sa Minglanilla ug Steve Colonia, 51, taga lungsod sa Tabuelan.

Kanilang tulo, si Mamolo ang nagrabehan kay siya ang unang naigo. Gikinahanglan pang gamitan og ekipo sa Quick Response Team sa Cebu City Disaster Risk Reduction and Management Office aron siya mahulbot gikan sa taxi unit.

Nilanat pag 30 minutos ang pagluwas kang Mamolo una pa nadala sa ospital.

Si Pragele nakaangkon og samad sa simod human maumod sa manubela dihang iyang unit naigo sa unit ni Mamolo.

Ang Fortuner nga gimaneho ni Dela Cerna nibangga og una ngadto na sa taxi nga maoy gimaneho ni Mamolo nga niresulta sa padasmag sa lubot sa taxi nga gimaneho ni Pragele ug milahos sa taxi nga mao pa lay pagplastar ni Colonia.

Si Dela Cerna nga nisugot nga ma-interview sa Superbalita Cebu nga way video niingon nga gikan pa siya sa dan Urgello nag-inom kuyog sa iyang mga barkada.

Sa iyang pag-uli, nilibot siya sa Fuente Osmeña Rotunda.

Iyang giangkon nga siya nakatulog samtang nagmaneho nga nagsubay sa Osmeña Boulevard.

Diha na siya makamatngon nga nabangga na siya sa tulo ka mga taxi ug nalimbuwad ang iyang sakyanan tungod sa impact.

Si Fabilliar nagtuo nga kusog ang dagan sa sakyanan ni Dela Cerna dihang nabangga base sa kadaut sa tulo ka mga taxi unit.

Si Dela Cerna gitanggong sa Fuente Police Station sa Cebu City Police Office. (BBT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph