Si Dr. Bryan Albert Lim usa ka infectious diseases doctor sa Cebu. Mitabang siya og pagpasabot kabahin sa Covid-19 ug sa sitwasyon niini. Mao kini ang iyang gi-post sa Facebook Nobiyembre 16, 2020.
1.Ang pagsaka sa gidaghanon sa mga kaso sa Covid sa nanglabay nga mga adlaw di tungod kay mas daghan ang gi-test. Ang gidaghanon sa mga tawo nga gi-test niadtong Oktubre ug karon managsama ra. Busa, duna gyud tuoy kalit nga pagsaka sa mga kaso.
2.Di pa kini surge, kay sa 59 ka mga kaso, duha ra ang gipaospital, ang uban naa ra sa isolation facilities o gi-home quarantine.
3.Maayo pag kahimtang ang atong mga ospital. Layo pa kaayo kita sa paghuot base sa kapasidad.
4.Ang 59 ka mga kaso nagkatag sa 20 ka mga barangay, nagpasabot nga ang posibleng mga tinubdan naa sa mga dapit diin magtapok ang mga tawo, sama sa, trabahoan, restaurants, karenderya ug transportasyon.
5.Ang pagsaka gibana-banang nahitabo mga 14 ka adlaw human sa Halloween. Mapaabot gyud ni, kay daghan ang mga tawo nga nangadto sa parties, panag-inom, karaoke ug uban pa. Klaro nga ang kagaw nagsunod sa lihok sa tawo. Wa pa ni labot sa epekto sa sale sa sapatos kay maghuwat pa kita og duha ka mga semana.
Unsay atoang buhaton aron kita makairog?
1.I monitor ug ipatuman ang standards sa trabahoan. Pagbansay og infection control officers. I-rotate sila aron way makaingon nga dunay bias. Tungod kay karon, sagad sa mga security guard ug waiter magpanagana sa pagpahinumdom sa mga customer sa pagsunod sa mga lakang paglikay kay mahadlok nga kasuk-an o di na mobalik sa ilang establisemento. Busa mas maayo kon ang officers di gikan sa establisemento.
2.Hatagan og insentibo ang mga establisementong nagtuman ug silutan ang wala.
3.Mga customer kinahanglan nga himuong suki ang mga establisemento nga nagsunod ning standards ug motaho sa mga nakalapas.
4.Minusan ang mga party. Kon gikinahanglan, himoa sa gawas ug limitahan ang mangapil. Airbnb kinahanglan usab nga i-regulate kay sagad ani nga mga balay abangan alang sa parties.
5.Sa Pasko, mas maayong mohatag o umentuhan ang bonus sa mga kawani ug di mag-party. Solemne ug yano.
6.Ayaw kahadlok sa pagpa test. Ang Cebu bulahan kay makahimo kitag PCR alang sa 5000 ka mga tawo matag adlaw. Ipadayon ang targeted testing sa siyudad sa mga propesyunal nga taas og risgo, sama sa guards, mga tawo sa delivery, health workers, drivers, uban pa.
7. Ipatuman ang hustong paglinya sa transportasyon. Idesinyo ang bus stops nga makapugos sa tawo sa paglinya.
8.Himoa nga dali ra ang pagkuha og face masks ug face shields sa bisan asang dapit. Basin makabutang kita og mask dispensers sa nagkadaiyang mga dapit.
Makapuyo kita uban sa virus! Atong ipadayon ang atong pagpakabuhi, apan mainampingon. (Superbalita Cebu)