DEAD on arrival (DOA) sa Danao Provincial Hospital sa Lunes sa hapon, Nobiyembre 16, 2020 ang usa ka 64 anyos nga lalake human giatake sa kasingkasing dihang naghubo sa iyang atubangan ang 28 anyos nga babayeng iyang nauyab pinaagi sa Facebook.
Si Captain Vincent Zozobrado, hepe sa Compostela Police Station, niingon nga sila si Tonyo (di tinuod nga ngan) ug Em-em (di tinuod nga ngan) nagkasabot nga magkita sa usa ka resort sa Estaca, Compostela human magkarelasyon.
Mga alas 4 sa hapon sa Lunes, ang duha nanulod og kwarto sa resort.
Naghubo na si Em-em sa ibabaw nga bahin sa iyang senina dihang kalit nga naglisod og ginhawa si Tonyo ug nireklamo nga sakit ang iyang dughan samtang nagsud-ong kaniyang naghubo, dugang ni Zozobrado base sa ilang imbestigasyon sa babaye.
Daling nanawag si Em-em og pakitabang sa mga staff, apan mga alas 4 pasado sa hapon gideklarar sa doktor nga DOA si Tonyo sa ospital.
Matod ni Zozobrado nga ang duha pulos minyo. (GPL)