GIPASIGARBO ni Mayor Sara Duterte-Carpio ang pasarasay sa kriminalidad sa Davao City tungod sa padayon nga pagpatuman sa mga awtoridad og "high alert" sukad pa niadtong 2016.
Sa State of the City Address (Soca) sa mayor niadtong Lunes, Nobyembre 16, gibutyag niini nga ang index crimes sa dakbayan niubos ngadto sa 53 porsiyento. Gikan 658 sa miaging tuig, niabot na lang kini og 306 karong tuiga.
Apan ang non-index crimes, nisutoy ngadto 74 porsiyento, gikan sa 2,887 niadtong miaging tuig, niabot na kini og 4,189 karon. Apan gipangatarungan sa mayor nga tungod kini kay daghan ang nadakpan tungod sa paglapas sa mga patakaran o health protocols sa Covid-19 karong tuiga.
Hinuon, gitin-aw sa mayor nga nag-unang gitutokan karon sa mga awtoridad mao ang ilegal nga druga ug terorismo ug ang paghatag og gibug-aton sa pagsagop sa "Culture of Security." Nagpasabot nga kinahanglan ang panag-alayon sa mga molupyo aron nga maseguro nga ang siyudad sa Davao magpabilin nga malinawon.
Giklaro ni Duterte-Carpio nga usa sa komponente nga angay nga masilsil ngadto sa matag panimalay mao ang "Kapag May Nakita, Dapat Magsalita" nga kultura. Kinahanglan matud pa nga ang mga molupyo motaho gilayon sa mga katingad-an nga mga tawo ug kalihukan sa ilang katilingban aron nga mahatagan gilayon og aksiyon sa awtoridad.
Gitumbok sa mayor nga ang paglusad og "community exercise" niadtong niaging bulan, nagpamatuod sa kaepektibo sa katakus sa mga Dabawenyo nga motaho sa mga posibleng hulga sa palibot.
Gitataw sab sa mayor nga padayon sab gihapon ang paningkamot sa Peace 911 alang sa malungtaron nga pagkomitar sa komunidad alang sa kalinaw sa mga lugar sa Paquibato.
Uban niini, mao ang pagpaningkamot sa lokal nga panggamhanan nga makatukod og University of Southeastern Philippines Extension Campus ug istasyon sa pulis sa Barangay Malabog, ug District Hall ug City Mayor's Extension Office sa Barangay Paquibato Proper. (WGM)