GIHULAGWAY ni Lapu-Lapu City Mayor Junard “Ahong” Chan nga fake news ang nikatap sa social media mga mag lockdown ang dakbayan sa umaabot kapistahan sa Nobyembre 20 ug 21.
Apan giklaro sa mayor nga adunay mga regulasyon nga ipatuman aron kalikayan ang pagtakdanay sa coronavirus disease (Covid-19).
Kini naglakip sa pagdili sa mga tapoktapok ug pagpamista sa kabalayan sa mga di kabanay o pamilya.
Mahimo ra usab nga makapanagkot ang mga deboto sa mahal nga Birhen sa Regla nga di taga Lapu-Lapu, apan inig kahuman og panagkot, sila giawhag sila sa pagpauli ug likayan ang pagpamista sa mga kaila.
Nangayo og pagsabot si Chan sa katawhan sa linahi nga selebrasyon sa kapistahan karong tuiga gumikan sa pandemya.
Gustohon man unta niya nga sadya ang selebrasyon, apan mas iyang gitagaan og gibug-aton ang kaluwasan sa tanan.
Ang kapistahan sa dakbayan kanunay nga gidagsa sa mga bisita tungod sa mga deboto sa Mahal nga Birhen sa Regla, apan panahon ning coronavirus disease (Covid-19), gidili a ng panagtapok. (GCM)