USA ka maayong desisyon ang pag-estrikto sa borders sa Cebu City ug Cebu Province nga gipatuman ni Cebu City Mayor Edgardo Labella.
Kini taliwa sa pagbalik pagsaka sa kaso sa Covid-19 sa Dakbayan sa Sugbo. Apan wa magpasabot nga gibasol ni Labella nga ang taga probinsya maoy nagdala sa maong sakit.
Gibalanse lang sa mayor ang ekonomiya ug health. Buot ipasabot nga di magkatakdanay ang katawhan.
Ug wa magikan sa baba ni Labella, nga mobalik sa lockdown ang Cebu City tungod sa Covid cases.
Mismo si Konsehal Joel Garganera, deputy implementer sa Emergency Operations Center (EOC), ang nilitok sa pag-granular lockdown kon mograbe.
Boljoon Fiesta
Malampuson ang kapistahan sa lungsod sa Boljoon, niadtong miaging Sabado nga pinasubay sa health protocol.
Si Cebu Boljoon Mayor Merlou Derama, nga nahinabi sa Agila, niingon ang kalampusan tungod sa pagkooperar sa katawhan.
Ang prosisyon gipaagi og motorcade pinasubay sa health protocol sama sa pagsul-ob og mask .
Sobling giklaro ni Derama nga negative ang result sa iyang swab test. Kay dunay iyang tigsaway nga kontra sa pulitika tigpalakaw og fake news.
Samtang, gisuportaan ni Cebu 2nd District Board Member Tata Salvador ang desisyon ni Gobernador Gwen Garcia dili pag-estrikto sa border.
Matud ni Salvador sa Interview sa Agila, sakto ang gobernador nga mihinayhinay na og lihok ang ekonomiya sa probinsya.
Gidugang ni Salvador, priority gihapon sa gobernador ang health conditions sa katawhan.
Sa Tudela, Camotes
Gipakita ni Mayor Jojo Solante sa lungsod sa Tudela Camotes, nga dunay katakos ang gamayng lungsod alang sa emerhensyang panginabanglan.
Dalaygon ang gihimo ni Solante, kanhi sakop sa media, ang pagpalit sa munisipyo og Toyota Commuter Deluxe ug gihimong ambulansya isip frontliner 24/7 emergency response service.
(efrenlonzon71@gmail.com ug text sa 09235562777)