DIGOS CITY -- Naukay ang mga molupyo sa dakbayan human mikatap ang post sa mga netizens sa social media nga adunay nakit-ang bomba nga nakasud og sling bag didto sa Suario Building sa merkado publiko Martes sa buntag, Nobyembre 17.
Daling nagpagawas og pahayag si Digos City Police Station (DCPS) Lieutenant Colonel Vici Anthony Tababa nga dili bomba ang sud sa sling bag kon di mga personal nga kagamitan human nabiyaan sa wa na ginganlang tag-iya niini.
Bisan pa man, miresponde gilayon ang mga sakop sa Provincial Explosive Ordnance and Disposal Team hinungdan nasuta nga dili bomba ang sud sa bag.
Samtang nagbahad sab si Tababa sa mga mahilig mag-post og fake news sa social media nga ilaha kining pagadakpon ug aduna kini silot subay sa balaod.
Samtang si Mayor Josef Cagas nagpasalamat sa kaabtik sa mga katawhan sa palibot nga mitaho dayon ngadto sa mga awtoridad dihang namatikdan ang katingad-ang butang.
Matud ni Cagas nga mas gipalig-on ang seguridad sa dakbayan luyo sa nasinating pandemya mao nga giawhag ang publiko nga likayan ang pagpakatag og sayop nga impormasyon.
Gimandoan sab sa mayor ang kapulisan nga mas hugtan ang pagpatrolya sa palibot aron di makahimo pagpahimulos ang mga dautang elemento sa nasinating krisis nga hatud sa Covid-19. (Orlando B. Dinoy)