DILI sa tanang higayon nga ang kuwarta maoy mopatigbabaw batok sa butang nga gusto nimong maangkon.
Sa tinamban nga pagka-istorya dili mabayran og sapi kon unsa man ang gusto nimong makab-ot.
Mao kini ang nahitabo karon ni James Harden, ang star player sa Houston Rockets kinsa sulod sa onse ka tuig sa NBA padayon pa gihapong nanikaysikay nga makaangkon og kampiyonato.
Naglut-og na man tuod ang mga individual awards nga iyang napupo ug naangkon apan wa pa gyud siyay bisan usa nga singsing sa kampiyonato nga nasul-ob, butang nga iyang gidamgo sukad niadtong 2019 diin siya nahimo ikatulong pick sa Oklahoma City Thunder.
Tuig 2012, si James nahimong Sixth Man of the Year” awardee, ang tuig nga niabot sa finals ang OKC apan napildi sa Miami Heat sa series.
Nahimong most valuable player sa 2018, kawalo malakip sa NBA All-Star, kapito kahigayon mapasidunggi isip sakop sa All-NBA Team.
Kabahin usab siya US national team nga mipupo og gold medals sa 2012 Summer Olympics ug sa 2014 Fiba World Cup.
Ang nahisgutan sa unahan maoy pipila lang sa mga natala sa impresibong record ni Harden nga makapaagni sa ubang mga teams.
Tungod niini, misaka usab og maayo ang kantidad sa iyang abilidad. Sa niaging semana, si Harden kinsa mitapon sa Houston Rockets human siya gi-trade niadtong 2012, gihugonhugonan nga gusto na usab nga mobalhin og laing team.
Nagtuo ang 31-anyos nga shooting guard nga dili ang Rockets maoy makahatag kaniya sa Larry O’Brien trophy bisan pa man sa tinguha sa management nga mapalig-ong ang team.
Daghan ang nagtuo nga sa dihang nahulbot na usab sa Houston si Russel Westbrook, ang kauban ni Harden sa Oklahoma City, maoy na kini magwanang sa ilang dalan paingon ngadto sa kampiyonato. Apan sukwahi sa gituohan, sa gihapon, kapakyasan maoy midayandayan sa ilang kampanya.
Niadtong Septiyembre, pipila lang ka adlaw human sila palagputa sa Los Angeles Lakers sa semifinals, ang ilang headcoach nga si Mike D’Antoni miluwat sa katungdanan.
Wa usab magdugay, bulan sa Oktubre misunod usab dayon sa pagbiya ang general manager nga si Daryl Morey. Dili pa igo, nabaniog usab nga gusto ni Westbrook nga magpa-trade ngadto sa laing team.
Gani aduna nay negusasyon ang Rockets ug Washington Wizards nga ibaylo si Westbrook ni John Wall.
Apan ang pinakauwaning gisumsuman karon mao ang paghangyo ni Harden ngadto sa management nga siya i-trade ngadto sa Brooklyn Nets.
Kon kini mahinayon, lupig pa unyay giagian sa bagyong Ulysses ang Rockets nga nawad-an sa ilang mga lig-ong haligi.
Tiaw mo bay kon mawala sa ilang poder si Westbrook ug Harden kinsa na may ilang masaligan ug maoy moasumir nga lider sa team?
Niini, gitinguha karon sa Rockets nga makabig ug magpabilin si Harden pinaagi sa pagtanyag og dakong kantidad nga maghimo kaniyang unang player sa NBA nga magsuweldo og $50 million matag tuig.
Pero dili interesado si Harden sa maong tanyag kay gusto gyud niya nga makauban og balik si Kevin Durant sa Brooklyn Nets.
Ang tanyag sa Rockets moabot og $103 million nga extension sa iyang kontrata, apan igo lang kini niyang giyam-iran.
Nagtuo siya nga kon magkauban sila og balik ni Durant hayag nga moabot sila sa finals sama sa ilang nahimo sa Thunder ug posibling makampiyon pa gani.
Kon atong tan-awon, makapalig-on gyud tinuora ang presensiya ni Harden sa Nets ilabi na kay anaa usab si Kyrie Irving.
Pero ang pangutana kon ikasabot ba kaha usab niya si Irving nga gawas nga susama kaniyag position pareha usab og style nga point conscious - kana bang ang priority mao ang pagpamuntos.
Dili kaha mag-ilog na hinuon sila kon kinsay unang makadokdok sa bola? Bintaha man tuod og magpunpon ang mga dekalidad nga mga players sa usa ka team, pero mas pabor kon ang chemistry sa team maoy hatagan og gibug-aton, ilabi na kay pulos ra ba minus og depensa ning duha. Just saying. (jun.migallen22@yahoo.com)