USA ka suspek nga carnapper nga dunay warrant of arrest ang nadakpan sa kapulisan sa lungsod sa Barili tungod sa Facebook.
Si Police Captain Romeo Caacoy Jr., hepe sa Barili Police Station, nagkanayon nga iyang gituyo sa pag-post sa Facebook sa mga hulagway sa mga wanted sa lungsod aron matabangan sa publiko sa pagtultol sa suspek.
“Halos mga tawo karon duna na may Facebook, mao na nga pinaagi niini ug ilang makita ug ilang ipahibalo sa amoa,” matod ni Caacoy.
Tuod man, ilang natultolan ang nahimutangan sa usa sa mga most wanted person nga taga Barili, apan ang duha ka mga kasong carnapping sa dakbayan sa Mandaue ug dakbayan sa Naga.
Ilang natultolan ang nahimutagan ni Juan Manigos Madrid, 47, taga Barangay Malolos, Barili, apan naa na nagpuyo sa Barangay Pung-ol Sibugay, bukirang barangay sa Dakbayan sa Sugbo.
Niadtong hapon sa Nobiyembre 17, 2020, si Madrid ilang nadakpan sa may Freedom Park, sa Carbon Market, Dakbayan sa Sugbo nga namaligya og used nga mga sapatos.
Uban kanila ni Caacoy ang Regional Special Operations Group (RSOG) 7 sa Regional Intelligence Division (RID).
Gidakop si Madrid base sa duha ka warrants of arrest, ang usa ni Judge Dalisay Chaves Ohdate sa Mandaue City Regional Trial Court Branch (RTC) Branch 85 sa kaso nga kalapasan sa Republic Act (RA) 10883 kun Anti Carnapping Act of 2016, nga dunay piyansa nga P300,000 ug ni Judge Don Felix Gumalo sa RTC Branch 76 sa Naga City sa susamang kaso nga dunay piyansang P180,000.
Nagtuo si Caacoy nga ang pagpamaligyag mga sapatos ni Madrid usa lang ka takuban sa iyang kalambigitan sa pagpangawat og mga motorsiklo.
Si Madrid nakugang dihang gidakop apan nikalma sa iyang pagkasayod sa duha ka warrant of arrest gikan sa korte sa kasong carnapping. (BBT)