Pagbalik sa mga PUJ naproblema

NAPAKGANG: Ang mga PUJ driver gipailawom sa swab test sa Siyudad sa Sugbo niadtong Nobiyembre 9, 2020 sa hawanan sa city hall, apan napakgang kay ang Department of Health (DOH) maoy miasumer. (Amper Campaña)
NAPAKGANG: Ang mga PUJ driver gipailawom sa swab test sa Siyudad sa Sugbo niadtong Nobiyembre 9, 2020 sa hawanan sa city hall, apan napakgang kay ang Department of Health (DOH) maoy miasumer. (Amper Campaña)

HAYAN molanat pag pipila ka mga adlaw ang paghuwat sa mga taga Dakbayan sa Sugbo sa pagbalik og biyahe sa mga traditional public utility jeepney (TPUJ).

Karon untang adlawa, Nobiyembre 19, duna nay mobiyahe nga mga TPUJ sa duha ka mga barangay, apan wa madayon.

Kini gumikan sa kakuwang sa personnel sa Land Transportation Franchising amd Regulatory Board (LTFRB) 7 ug Land Transportation Office (LTO) 7 nga makapahigayon og one-stop shop sa Cebu City.

Ang ilang mga personnel nagtiwas pa sa Mandaue City kay ang ilang mga TPUJ pabalikon na usab og padagan.

MGA ROTA

Si Konsehal James Cuenco, chairman sa Cebu City Jeepney Task Force, nagkanayon nga karong Biyernes, Nobiyembre 20, makasugod ang one-stop shop para sa 100 ka mga TPUJ nga mobiyahe gikan ug paingon sa Guadalupe ug Lahug.

Ang duha maoy adunay labing daghan og mga pasahero sa mga dapit sa dakbayan.

Isunod sa one-stop-shop ang Labangon nga ruta sa Nobiyembre 23 ug ang Basak-Pardo-Bulacao sa Nobiyembre 24.

Sa Nobiyembre 25, ang nagbiyahian sa barangay Mambaling ug Inayawan ug sa Nobiyembre 26 ang Talamban ug Pit-os.

Samtang kadtong mga TPUJ nga mahagbong sa inspeksyon makabalik sila pagpa-inspeksyon sa Nobiyembre 27.

LAING PROBLEMA

Gipahibawo usab ni Cuenco nga bisan kon makumpleto na ang mga papeles sa mga TPUJ aron makabalik og pasada, adunay posibilidad nga malangay og diyutay ang ilang pagbalik. Kini kon wala pa gihapon ang mga resulta sa swab test.

Ang SunStar Cebu nisuway sa pagkuha sa habig sa DOH 7, apan sa pagsuwat ning taho wala pa silay tubag.

Base sa Executive Order 102 ni Mayor Edgardo Labella, kinsa maoy gusto nga makabalik na og pamasahero ang mga TPUJ, kinahanglan nga negative sa swab test ang driver una makapamasahero.

Ang City Government, pinaagi sa mga personnel sa Emergency Operations Center (EOC), nipahigayon na unta og swab test sa mga driver, apan wa kini mahuman sanglit nisulod ang DOH 7.

Samtang mopakatap og mga personnel sa Police Traffic Unit ang kapulisan sa siyudad sa Sugbo kon magsugod nag panagan ang mga TPUJ.

Matod ni Police Lieutenant Colonel Wilbert Parilla, deputy city director for operations sa Cebu City Police Office, nga bisan wa pa sila makadawat og impormasyon gikan sa Cebu City hall, ilang bantayan kon misunod ba sa minimum health standard ang mga driver.

Dugang ni Parilla nga ang presensya sa mga pulis sa kadalanan gikinahanan aron masiguro nga nasunod sa mga driver ang health protocol sama sa pagbutang og division sa lingkuranan nga dili mag dikit ang mga pasahero.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph