Dead on arrival sa Barili Rural Health Unit (BRHU) ang usa ka gikatahapang durugista human naunhan og pusil sa pulis nga nagpakaaron ingnon nga mopalit og shabu sa usa ka buy-bust sa Huwebes sa kaadlawon, Nobiyembre 19, 2020.
Ang grupo ni Police Captain Romeo Caacoy Jr., hepe sa Barili Police Station, nipahigayon og buy-bust batok kang Warren Patiga, hingkod, taga Barangay Patupat sa maong lungsod.
Usa ka pulis nga poseur-buyer nipalit og shabu kang Patiga, apan dihang nakabantay ang suspek nga pulis ang iyang baligyaan, giingong nibunot kini sa iyang armas, apan naunhan sa pulis.
Naigo sa nagkadaiyang bahin sa lawas si Patiga.
Siya nakuhaan og shabu nga motimbang og 5.12 gramos nga dunay Dangerous Drugs Board (DDB) value nga P34,812 ug kalibre .45 nga pistola nga dunay mga bala.
Si Patiga kanhi drug surrenderer sa lungsod, apan nibalik sa ilegal nga kalihukan. (BBT, GPL)