MOIHAP na sa 115 ka mga indibidwal ang gisita sa kapulisan human sa subling pagpatuman sa Food and Medicine (FM) pass niadtong Nobyembre 17.
Sumala ni Davao City Police Office (DCPO) spokesperson Police Captain Rosario Aguilar nga ang maong ihap gikan sa nagkadaiyang bahin sa siyudad.
Sukad Marso, ang malapason sa pagpatuman sa FM pass miabot na og 2,585 samtang anaa sa 9,758 ang nakalapas sa gipatumang quarantine protocols.
Mga sagad sa kalapasan mao ang curfew, liquor ban, social distancing, wa pagsuot og face mask, ug face shield ug ang pagsakay sa motor nga way barrier.
Sa checkpoint sa Piapi Mini Market sa Quezon Boulevard, Davao City, nakaandam ang blotter form alang sa mga malapason.
Ginasita sab sa mga pulis ang mga pasahero nga wala gisuot og tarong ang ilang face shield ug ginapanaug ang wala niini.
Ang Davao City ning bulana sagad mag numero uno sa rank niini sa mga daghang ihap sa kaso sa Covid-19 sa mga lugar sa Pilipinas.
Tungod sa kaso nga nagkataas, mirekomenda ni National Task Force Against Covid-19 policy chief implementer Secretary Carlito Galvez Jr. nga ibalik sa general community quarantine ang dakbayan, apan wala pa’y pinal nga pag-anunsyo ang local chief executive ning siyudad. (Jeepy P. Compio)