Mga duwa karon
3:45 pm-Ginebra batok Meralco
6:30 pm- TNT batok Phoenix
Pulos nagtinguha og 2-0 nga bintaha ang Brgy. Ginebra Gin Kings ug Talk N’ Text (TNT) Tropang Giga sa ilang pagpakigbatok og lainlaing kontra sugod karong hapon sa Game 2 sa 2019-20 Philippine Basketball Association (PBA) Philippine Cup semi-finals best-of-five series sa AUF Gym sa Angeles City, Pampanga.
Ang Gin Kings makigbatok sa Meralco Bolts sa premirong duwa nga sugdan sa alas 3:45 sa hapon samtang ang Tropang Giga nga makigharong sa Phoenix Super LPG Fuel Masters sa main game.
Ang Gin Kings, nga maoy No.1 team human sa elimination round, yanong ninglampornas sa Bolts, 96-79, sa Game 1 nga nakahatag kanila og dugang moral paingon ning sangkaa.
Taliwala sa dako nilang kadaugan, si Ginebra coach Tim Cone wala gihapon makuntento ug nasayod siyang bangis nga magtinguha og panimalos ang Bolts ug mao kini ang angayan nilang pangandaman.
“We have to quickly move forward from last night. Everything went right for us and everything went wrong for them in the last game. That’s not going to happen tomorrow. We’re going to need to come out mentally stronger,” batbat ni Cone sa interbyu sa www.pba.ph kagahapon.
Sa Game 1, tataw nga nagluya ang puwersa sa Bolts gumikan kay gikan kini sa makutas nga tahas sa quarter-finals diin ilang gitangtangan og korona ang defending champion ug twice-to-beat nga San Miguel Beermen.
Karon nga nakapahuway na ang Bolts, gilauman nga makapagawas na kini sa ilang puwersa.
Sa ilang bahin, ang Tropang Giga ningsubay og grabeng pagpanghudlat una nila nadispatsar ang Fuel Masters, 95-92, sa Game 1 sa kaugalingon nilang series.
Ning duwaa, ang pambato sa Fuel Masters nga si Matthew Wright naangol (sprained ankle) sa 1st quarter pa lang hinungdan nga igo kang kini nakamugna og duha ka mga puntos nga layo ra sa iyang average nga 22 puntos nga average sa elimination round.
“What’s good about Game 1 is, although Matthew only played six minutes, we still gave ourselves a chance to win,” matod ni Phoenix coach Topex Robinson.
Gilauman nga makaduwa si Wright karon hinungdan nga angayang mangandam og maayo ang Tropang Giga. / ESL