Bisan og kapila nako magbalik-balik og saka, ma-amazed lang gihapon ko sa view.
Dihang nakadungog ko sa gisulti sa akong kauban nga lumad nga taga-lungsod sa Catmon, Sugbo na excited ko sa among adventure sa Mt. Kapayas.
Ang Mt. Kapayas maoy ikaduha sa labing taas nga bukid sa Sugbo ug nasayod ko nga dili sayon ang pagsaka sa maong bukid. Ang Osmeña Peak sa Dalaguete maoy kinatas-an.
Nahimutang ang Torre o Lantawan Peak o mas nailang Mt. Kapayas sa lungsod sa Catmon amihanang bahin sa lalawigan sa Sugbo.
Usa kini sa key biodiversity areas sa Sugbo busa inampingan kini sa local government unit ug sa mga residente.
Permit
Sa dili pa mosaka, gikinahanglang mokuha og guide, molukat og permit sa munisipyo (P250/10 ka tawo) ug magparehistro sa police station.
Kini aron masiguro ang kaluwasan sa mga mosaka ug rescue efforts kon adunay emerhensiya nga motumaw. Molanat sa usa ngadto sa duha ka oras ang pagsaka sa peak.
Challenging ang trail nga moagi og tangason, mossy forest ug batuon nga sama ka nga nagrock climbing.
Apan ang imong kahago ug kakapoy mahupay inig abot sa peak nga mohatag kanimo og 360 degrees nga view sa Catmon ug kasikbit nga mga lungsod.
Unsaon pag-adto?
Adunay mga bus padulong sa Catmon gikan sa North Terminal sa Dakbayan sa Sugbo ug molanat sa dul-an duha ka oras ang biyahe ngadto na sa munisipyo sa Catmon.
Gikan sa munisipyo sakay og habal-habal o multicab padulong sa jump off point nga moabot og kapin usa ka oras.
Side trip
Tinubdan Falls. Mamahimong mag sidetrip sa Tinubdan Falls human sa trek.
Ang kabugnaw sa tubig sa maong busay makahupay gyud sa pama-ol sa lawas gikan sa pila ka oras nga pagsaka.
Walay entrance fee ang Tinubdan. Mamahimong mohatag og donation fee alang sa pag mintenar sa lugar.
Karon nga inanay ng giablihan pagbalik ang turismo sa probinsiya sa Sugbo, ubay-ubay na usab ang mga misruoy sa maong dapit.
Be responsible
Pahimangno lang nga kon mobisita ta sa laing lugar, atong i-practice ang Leave No Trace (LNT) habit.
Nagpasabot nga “be responsible” nga laagan, ang mga basura gikan sa iyang kinan-an o gi-imnan gikihanglang hipuson ug dili bilin og hugaw sa area.
Atong ampingan ang kinaiyahan nga gipahuwam ra kanato gikan sa Kahitas-an aron kini mapahimuslan pa sa umaabot nga henerasyon.