Duhay kapilian sa House of Representatives kon unsay buhaton sa Cebu City north district nga nabakante sa pagtaliwan ni Kongresista Raul V. del Mar niadtong gabii sa Lunes, Nobyembre 16, 2020 sa usa ka ospital sa Manila sa edad nga 79-anyos.
Si Atty. Marchel Sarno, Commission on Elections (Comelec) Cebu City north district election officer, niingon nga ang House mahimong mopasar og resolusyon nga mag-awhag sa Comelec sa pagpahigayon og usa ka special election sa north district o ang House Speaker motudlo sa usa ka caretaker sa maong distrito.
Madugay, matod niya, ang pagpahigayon sa usa ka special election kay mangita pa og pundo ug kinahanglan pang ipakanaog ang lagda sa pagpahigayon sa eleksyon taliwa sa Covid-19 pandemic. Samtang kinahanglan nga usa ka incumbent House member ang itudlo nga caretaker sa nabakante nga distrito.
Si Cebu City south district Rep. Rodrigo “Bebot” Abellanosa miingon nga maoy naandan sa Kongreso ang pagtudlo sa usa ka caretaker sa nabakante nga distrito inay sa pagpahigayon sa usa ka special election.
Nunot niiini, gusto ni Abellanosa, kauban ni del Mar sa Bando Osmena Pundok Kauswagan (BOPK), nga si House Speaker Lord Allan Velasco maoy magsilbi nga caretaker sa Cebu City north district.
Nanghinaut si Abellanosa nga ipadayon ni Velasco ang mga proyekto ug mga programa ni del Mar. Apan hain kamaayo kon si Abellanosa, nga maoy mas labing nasayod sa mga proyekto ug mga programa ni del Mar, maoy itudlo ni Velasco nga caretaker?
Sa pagtaliwan ni Kongresista Raul del Mar, nahimong orphan, usa ka ilo, ang Cebu City north district. Unsa man kaha ang mahitabo sa distrito nga iyang gialagaran sud sa miaging 27 ka tuig?
Si Cebu City Councilor Niña Mabatid misaad nga ipadayon ang mga maayong nabuhat ni del Mar. Matod niya, “You have done more than enough for the Cebuanos. Kong Del Mar di namo pasagdan ang north district nga imong gialagaran sulod sa 27 ka tuig and as a local legislator, we are here to continue the good deeds you have done for Cebu City.”
Apan lahi gyud kon ang House Speaker maoy mahimong caretaker sa north district. Matod pa ni Senador Panfilo Lacson, binilyon ang pundo nga gigahin sa mga distrito sa giproponer nga 2021 budget. Samot na kon House Speaker ang caretaker sa distrito.