Grabe ang pagsaka sa mga kaso sa coronavirus disease (Covid-19) sa tulo ka mga siyudad sa Metro Cebu.
Ang pagsaka gikan sa 200 ngadto sa 400 porsyento sud lang sa usa ka semana.
Nakamatikod ang Department of Health (DOH) 7 og dako nga kabag-uhan tali sa gidaghanon sa mga bag-o kun nadugang nga mga kaso sa Covid-19 sa mga Syudad sa Cebu, Mandaue, ug Lapu Lapu sukad sa Nobiyembre 1 ngadto sa 14, 2020.
Makita sa gipagawas nga taho sa DOH 7-Regional Epidemiology and Surveillance Unit (Resu) niadtong Miyerkules, Nobiyembre 18, nga ang Siyudad sa Sugbo nakabaton og 302.9 porsiyento nga growth change kun kausaban sa pagsaka sa mga kaso.
Gikan sa 35 lamang ka mga bag-o nga Covid-19 cases nga natala gikan Nob. 1 ngadto sa 7, miabot sa 141 ka mga bag-o nga kaso ang natala sulod lamang sa usa ka semana, Nob. 8-14.
Susama ang kahimtang sa Dakbayan sa Lapu-Lapu, kansang growth change kun pagsaka anaa sa 292.9%, gikan sa 14 ka bag ong mga kaso sukad sa Nob. 1 hangtod 7, nakatala kini og 55 ka dugang nga mga kaso Nob. 8-14.
Sa Dakbayan sa Mandaue, gikan sa pito ka napuno nga mga kaso sulod sa usa ka semana, Nob. 1- 7, adunay 41 ka mga bag-o nga kaso ang napuno Nob. 8-14 kun 485.7% nga kausaban sa pagsaka.
Matod ni Dr. Mary Jean Loreche, DOH 7 spokesperson, kini resulta sa lainlain nga mga hinungdan.
“If you look at the number of newly diagnosed cases, and those who have the virus (from) Nov. 1-7 logged in smaller numbers comparing to the week before it, but the week Nov. 7 to 14 showed higher numbers of positive individuals thus the increased growth change,” matod niya.
NGANO?
Lakip sa mga nakaingon niini, matod niya, mao ang intensibo nga contract tracing nga nagpasabot nga giapil og swab test ang mga second generation close contacts sa pasyente; niluag nga mga border controls nga nakaingon sab sa pagsige gawas-gawas sa mga tawo ug ang pagpataas sa kapasidad sa mga business establishments inubanan sa mga panahon nga maluag usab ang ilang pagpatuman sa mga health protocol.
Dugang ni Loreche nga kinahanglan i-reinforce ang pagpatuman sa minimum health standards.
“In a way yes (it is alarming), but since our healthcare capacities, TTMFs laboratories are equipped , then we are not so alarmed,” matod niya.
Matod niya ang kinahanglan nga buhaton sa publiko mao ang pagka mabinantayon ug mahuna-hunaon sa ilang mga kalihukan ug dawaton ug tumanon ang mga health protocol.
Samtang nakalapas na usab ang Cebu City sa 300-mark sa mga active Covid-19 cases human kini maka rekord og 25 ka mga bag-o nga kaso niadtong Miyerkules, Nobiyembre 18. Sa pagkakaron, aduna kini 306 nga nahibilin nga mga active Covid-19 cases.
Ang mga nahibilin nga kaso sa Lapu Lapu City (95) ug Mandaue City (66) anaa gihapon ubos sa 100-mark.
WAY COVID
Tulo ka mga barangay sa Mandaue City wa nay aktibong mga kaso sa Covid-19. Kini naglangkob sa Barangay Mantuyong, Centro ug Tawason.
Sa pakighinabi sa Superbalita Cebu kang Dr. Ligaya Lakambini Dargantes, Covid-19 patient care and management head sa Mandaue, nga bisan sa pagsaka sa mga kaso sa Covid-19 sa dakbayan, di kini second wave.
Matod niya nga matag adlaw dunay single digit ra ang gidaghanon sa infections matag adlaw ug niadto lang Nobiyembre 15 nisaka og 18 ang mga kaso. Pagkasunod adlaw, nikanaug na usab kini.
Usa sa iyang gitumbok nga posibleng hinugdan mao ang pagpangabli sa mga establisemento ug agresibong contact tracing.
Sa laing pakighinabi, matod ni manlalaban Julius Ceasar Entise, pangu sa contact tracing team sa Dakbayan sa Mandaue, nga sagad sa mga nagpositibo sa dakbayan nakaangkon sa virus sa ilang trabahoan.
IPAKATAP
Sugod sa unang adlaw sa Disyembre, ang Cebu City Police Office (CCPO) mopakatap og daghang mga pulis sa kadalanan.
Tumong niini mao ang pagbaha sa mga tawo nunot sa Pasko ug di na makatuman sa mga health protocol sama sa pagsul-ob og mask ug social distancing.
Matod ni Police Lieutenant Colonel Wilbert Parilla, deputy city director for operations sa CCPO, nakadawat usab silag impormasyon gikan sa buhatan ni Mayor Edgardo Labella nga daghang mga kan-anan ang nakalapas sa mga lagda sa Inter-Agency Task Force.
“Base sad sa direktiba sa atong mayor, ang usa sa mga yangungu sa atoang business sector, daghan na silag nakita nga mga restaurants and mga bars nga naka-violate na sad sa health protocol. Sa pagsugod, naa pa ang social distancing. But as of now, nagkadugay, hing increase na ang number sa ilang customers nya na violate na ang protocol,” matod ni Parilla.