MAAYONG adlaw! Kalinaw, kabaskug ug kalipay tungod kuntento ang kasingkasing sa matag-adlaw nga panalangin sa Kalangitan ang akong panghinaut sa tanan.
Ang New Visayas Association of Differently-Abled Persons (Nadap) pundok sa Barangay New Visayas, Panabo diin ang mga miyembro niini adunay mga pisikal, mental ug sikolohikal nga panginalanglanon.
Sa pagkatinuod, wala ko nasayod kon kanus-a gayud natukod ang maong pundok apan namiyembro na ang akong anak nga naay ADHD (luhag kaayo) sa tulo ka tuig na kapin.
Isip miyembro, ubay-ubay na pod ang mga kaayohan ang natagamtaman sa akong anak sama sa mga hinabang gikan sa probinsya ug syudad nga social welfare offices.
Ang Nadap sa kasamtangan nabalot og daghang kontrobersiya sama sa dili klarong pag-amping sa panalapi niini, pagtigbabaw sa personal nga interes sa opisyales ug uban pa hinungdan nga barangay mismo nagpakitag malasakit ug nagpangutana sa direksyon sa gisugdan nga water refilling nga koopertiba sa Nadap
Tuod man, ang mga representante mismo sa City Social Welfare Office ug mga personahe sa syudad nga dunay katakus nga mogiya sa pagmugna ug pagpadagan sa kooperatiba ning tambong sa asembleya niadtong ika-23 sa Oktubre sa Barangay New Visayas mismo, kauban ang opisyales sa barangay.
Sa maong panagtigum, naghatag og eksplinasyon ang kanhing presidente ug operations manager nga si Leonido Rivera. Nakahigayon pod og pagpangutana ang mga miyembro sa tinuod nga istado sa pundo ug uban pang mga isyu.
Nadesisyonan sa asembleya nga magpili og mga bag-ong opisyales diin si Raymond Palabao ang nahimong bag-ong presidente, Emma Laorden ang bise, Rosario Salva ang treasurer kaniadto ug karon gihapon bisan wala niya naampingan ang kwarta sa miyembro kay iya kining giriles sa presidente bisan walay pag aproba sa asembleya.
Ang rason ni Salva nga gihatag niya ang kwarta kay mando sa presidente ug ang pamulong niya kay sa kapitan nga mahadlok pod siya nga tanggalon sa iyang posisyon pagka cashier kay mawad-an siyag trabaho. Nahimong oditor si konsehal Diosdado Allawan ug duha ka PIO nga sila Roger Babia ug Dominador Garcia.
Sa mga Board of Directors, napili nga chair ning inyong kiat nga higala. Chair sa socio-cultural si Josica Aranas nga igsuon sa treasurer, Sa Finance si Jeneveb Mangquit nga silingan nila Aranas ug Salva ug sa Ways and Means si Rolando Masilliones.
Sa pagkatinuod, perstaym nako sa ingon aning posisyon ug obligasyon busa naningkamot kog tuon. Si Palabao nga presidente nagpahibalo pod sa asembleya nga dili siya hanas sa maong responsibilidad mao nangayog suporta sa matag-usa. Nagpasalamat pod sya sa pagboto kaniya sa maong posisyon.
Sa pagkatinuod, sa unang duha ka meeting namo, “morag” nagpatigbabaw ang personal nga interes sa pipila ka mga opisyales (dili tanan). Makaluya siyempre kay ang gideklara nga katuyoan sa balaod nga nagdumala sa mga kooperatiba (Republic Act 6938, naila usab nga kooperatiba Code of the Philippines) aron mapalambo ang paghimo ug pagtubo sa mga kooperatiba ingon usa ka praktikal nga salakyanan alang sa paglansad sa pagsalig sa kaugalingon ug magamit ang gahum sa mga tawo padulong sa pagkab-ot sa ekonomiya pag-uswag ug hustisya sa katilingban dili personal nga pamugasan.
Nagsugod pa lang ang bag-ong opisyales og lingkod. Akong pag-awhag sa tanang miyembro nga moapil, motingog ug mosuporta sa mga kalihokan ta. Daghan pay mga wala naplantsa nga transaksyon ug kabtangan sa kooperatiba sa pagpamuno ni Rivera nga gikan sa mga miyembro ang kwartang nakolekta. UNTA KINI MAHAN-AY UG TANAN MAGTINABANGAY DILI MAG UGUMAY, hmp!!!