NABALIK gayod sa general community quarantine (GCQ) ang Davao City, sugod kagahapon, hangtud kini sa Nobyembre 30, 2020.
Gianunsyo kini ni Presidential Spokesperson Harry Roque human sa daghan nang mga adlaw nga ang siyudad anaa sa rank 1 sa listahan sa Department of Health (DOH) sa mga lugar sa Pilipinas nga dunay daghang kaso sa coronavirus disease (Covid-19) sa nasud.
“The City of Davao is placed under general community quarantine (GCQ) effective immediately until November 30, 2020, following the rise of Covid-19 cases in the city.”
Dugang pa, “Melquiades Feliciano, Deputy Chief Implementer of the National Task Force (NTF) Against Covid-19 for the Cities and Bacolod and Cebu, has been assigned to head the Coordinated Operations to Defeat the Epidemic (CODE) teams that will be deployed in Davao City to assist in the response activities.”
Ning tungora, tanghaga gyod sa hunahuna sa katawhang Dabawenyo ang pagsutoy sa kaso, ug nagpangutana unsay mga hinungdan, nga gatuman man gyod ang taga Davao City sa mga health protocols.
Lagmit kining migula karon nga mga resulta mao kining sa nangaging bulan nga karon lang na-tally, kay kon pasanginlan ang local transmission, dili kini malikayan labi na nga naningkamot gyud og gawas ang mga tawo aron di magutman.
Kining kapin sa usa ka semana nga GCQ, unta kini ang dalan nga makubsan ang kaso kay kon mosamot kini tungod sa pagpasagad, basin unya mabalik sa Enhanced-CQ.
Motuman kita sa mga health protocols, magtinabangay sa pagbugno sa Covid-19.