NANAWAGAN si Davao City Mayor Sara Duterte-Carpio ngadto sa katawhan sa Siyudad sa Davao nga mangandam sa kaugalingon kay posibleng molanat pa hangtud sa Disyembre ang pagpailawom sa dakbayan sa general community quarantine (GCQ).
Nahitabo ang panawagan sa mayor Biyernes sa hapon, Nobiyembre 20, 2020, atol sa paghinabi kaniya sa 87.5 FM Davao City Disaster Radio human gipailawom ang dakbayan sa GCQ classification hangtud sa Nobyembre 30, gumikan sa pagsutoy sa ihap sa nataptan sa coronavirus.
"Mas maayo na lang nga iandam nato ang kaugalingon nga we will still under GCQ (quarantine classification) for the month of December," awhag sa mayor.
Tungod niini, nibalik na sab kita sa kanhi mga sumbanan sa quarantine gikan sa modefied general community quarantine kon diin dunay mga kausaban nga mahitabo.
Usa na niini ang pagpamubo sa mga oras sa curfew gikan sa alas 7 sa gabii hangtud sa alas 5 sa kaadlawon, mahimo na kining alas 9 sa gabii hangtud sa alas 4 sa kaadlawon aron mga establisemento mas malugwayan pa ang operasyon tungod gitugtan lang sila og 50 hangtud 70 porsiyento nga occupancy.
Gitin-aw sa mayor nga ubos sa GCQ, way establisemento nga hingpit nga manira.
Gipahibawo sa mayor nga ang Roxas Night Market temporaryong sirad-an sugod Biyernes, Nobyembre 20, gumikan kay kinahanglan sa siyudad ang pagpakatag og dugang security personnel sa ubang mga chekpoint sa siyudad.