Dako ang pagbasol sa akong iyaan nga si Nene kay hapit na siya 80 anyos unya wa pa gihapon siya matagbaw sa iyang mga gustong pangbuhaton ug ubang tulumanon.
Iyang tambag sa mga manghod niya nga mga senior citizens (60 nayos paataas) mao ang pagpangga sa kaugalinon kay human naman naka-atiman sa ubang membro sa pamilya gikan sa ginikanan, igsuon , bana/asawa og mga anak.
Kung mamalit man ugali og prutas o utanon sa mga ginangmay nga manindahay, ayaw na daginuta og hangyo kay kining ilang gamay nga ginansiya makatabang na para makapatungha sa ilang mga anak ug makapalit sa ilang panginahanglnon. Pakapini hinuon kini og tip.
Kung mangaon sab sa gawas, ayaw pagduha-duha og hatag og dako nga tip (extra money) ngadto sa nagsilbe nimo o waitress. Ngano? Kini sila naningkakamot nga maka-extra gamay kay igo-igo ra sab ni ilang suweldo.
Ayaw sab pa-undanga o putla sa nagbalik-balik nga estorya ang mga edaran bahala na og mura’g plakang guba kay makatabang kini og dako pagpabalik sa ilang mga ma-anindot nga kasinatian ug kagahapon.
Undangi na sab ang pagsegi og pangureksyon sa uban bisag sa imong pagtuo sayop sila. Hinumdumi ‘nobody is perfect’. Mas maayo nga way lalis unya dunay kahusay, kahilom og pagsinabtanay.
Ayaw ihikaw ang paghatag og pagdayeg kay gawas nga libre kini, maka-palipay pa kini sa nakadawat . Unya kung ikaw sab ang daygon, ayaw pagmakuli sa pagpasalamat.
Undangi na ang pagkuti-kuti sa ,mga gagmay nga butang, buling o hugaw nga imong makit-an kay ang personalidad ug kina-iya man sa nagsul-ob ang mas importante.
Biya-i ug palayo niadtong wa maghatag nimo og bili, respito og importansiya kay ikaw mismo nakahibalo man sa imong pagkatawo.
Paningkamot kada adlaw nga magpakabuhing malipayon og dunay tumong nga mura’g imo ng katapusan kay di biya nato matag-an ang panahon kung anus-a kita kuhaon sa dayon sa naghimo nato.
Hinumdumi ang imong kalipay wa magdepended sa uban busa ayaw pabuot ug padikta sa way labot.