Dili mominos 46 ka sidewalk vendors ug store encroachment sa dalan ug 74 ka mga illegal parking ang nahawanan na sa Mandaue City Enforcement Unit (MCEU) atol sa pagpahigayon nila sa road clearing operation sa tulo ka mga barangay sa dakbayan.
Gisugdan niadtong Nobiyembre 17, Martes, ang road clearing operation diin hawanan nila ang city roads, national roads ug barangay roads batok sa mga illegal parking, sidewalk vendors ug store encroachment sa kada barangay diin nagsugod sa Barangay Maguikay.
Matod ni Erwin Jumao-as, pangulo sa MCEU, matag adlaw sukad niadtong Nobiyembre 17 gigahinan sa ilang mga kawani og lima ka oras ang barangay nga gi-schedule sa clearing operation.
Gawas sa ilang mga kawani lakip sab ang Traffic Enrforcement Agency of Mandaue ug ang Mandaue City Police sa road clearing operation sa mga barangay.
Sa unang adlaw, nakasikop silang Jumao-as og 30 ka mga motorsiklo nga nag-illegal parking sa Maguikay.
Wala silay nahatagan og citation sa maong mga illegal parking ug ilaha lang gipasabot ang mga drayber sa motorsiklo nga gidili kining ilang gibuhat nga pag-park daplin sa dalan.
Samtang, 30 ka mga sidewalk vendors ang ilang napapahawa sa pagpamaligya sa sidewalk.
Matod ni Jumao-as nga wala ra misukol ang mga sidewalk vendors gani pipila niini niboluntaryo pa og pagguba sa ilang mga lamisa nga nakaali sa dalan.
Nobiyembre 18, gipahigayon ang clearing operation sa Baranagy Bakilid ug Barangay Tabok.
Sa Barangay Bakilid, matod ni Jumao-as, adunay 13 ka mga nabadlongan tungod sa pag-illegal parking, diin unom niini naisyuhan og citation, lima gipabalhin lang og parkinganan, usa ka motor ang na-impound samtang usa ka sakyanan ang gi-clamp. / KFD