Mga lokal nga kagamhanan mahimo nang motugot sa mga bata nga nagpanuigon og ubos sa 15 anyos ug senior citizens nga saylo sa 65 anyos nga makabiyahe alang sa katuyoan sa turismo sa mga dapit ubos sa modified general community quarantine (MGCQ), matod sa pamahayag Malacañang sa Biyernes, Nobiyembre 20, 2020.
Ang Inter-Agency Task Force (IATF) for the Management of Emerging Infectious Diseases, atol sa ilang tigom sa Nobiyembre 19, nilugak sa age restrictions sa turismo “upon the determination of the LGUs and guidelines to be issued by the Department of Tourism (DOT), the Department of Health (DOH) and the Department of the Interior and Local Government (DILG).”
MIHANGOP
Mga opisyal sa Sugbo nangalipay ning mao nga kalamboan, usa ini si Gobernador Gwendolyn Garcia, kinsa niadto pang Agusto nibukas og balik sa turismo sa Sugbo.
Gusto ni Garcia nga makabangon ang industriya sa turismo tungod sa pagkapiang niini sa pagsugod sa quarantine sa unang quarter sa 2020.
Tungod niini, nagpasalamat si Garcia sa nahiusahan nga desisyon sa IATF.
“We thank the IATF for affirming our position. This will be a much-needed boost to the country’s tourism industry and the economy,” matod ni Garcia sa Superbalita Cebu sa Nobyembre 20.
Subay sa uwahing datos sa Probinsya, moabot na sa 212 ka mga tourism establishments ang nangabli ubos sa MGCQ status.
Ang maong mga establisimento nakapasar sa inspeksyon sa Provincial Tourism Task Force (PTTF) pagsiguro nga nisubay kini sa mga health protocol.
Gikalipay usab kini ni Lapu-Lapu City Mayor Junard Chan, kinsa dugay nang nihangyo nga luagan ang restrictions sa mga bata ug tiguwang nga gusto manuroy sa tourist spots sa dakbayan.
Matod ni Chan nga sa una pa siya sige og hangyo niini sanglit ang kasagaran sa mo-check-in sa mga hotel ug resort sa dakbayan mga pamilya.
Luoy usab ang uban nga dili makakuyog og check-in gumikan lang kay maigo sa age restriction nga gipatuman.
Alang sa mayor kon adunay confirmed booking nga ikapakita wala ra kini problema gumikan kay gitugot man ubos sa MGCQ. “It is very advantageous to the city of Lapu-Lapu but of course mosunod gihapon ta sa minimum health protocol by the IATF,” matod ni Chan. / Dugang taho ni JJL