(UPDATED) Posibleng nalumos ang wa mailhing babaye nga nakaplagang patay mga alas 6 sa buntag sa Sabado, Nobiyembre 21, 2020 sa Cotcot River, Purok Ipil-ipil Brgy. Estaca, Compostela, amihanang Sugbo.
Mao kini ang gibutyag ni Police Captain Vincent Zozobrado, hepe sa Compostela Police Station sa Superbalita Cebu.
Si Zozobrado niingon nga ang biktima wa pa nila mailhi.
Ang nakakaplag sa biktima mao si Rossel Antogop Estrada, 44, dalaga, taga Purok Ipil-Ipil, Barangay Estaca sa mao nga lungsod.
Matod ni Zozobrado nga Sabado sa buntag, nakadawat sila og taho sa usa ka concerned citizen nga dunay nakaplagang patay nga lawas sa usa ka babaye sa nahisgutang dapit.
Ningresponde ang iyang mga sakop nga sila si Police Staff Sergeant Fedilito Jopia, Police Staff Sergeant Daryl Rondina ug Patrolman Jhan Jacob Cavite.
Matod ni Zozobrado nga nagbuy-od ang lawas sa babaye daplin sa sapa.
Sa paghiling ni Dr. Vincent Echen, patay na ang babaye apan wa silay nakitang mga samad sa lawas nga timailhan sa foul play. Ang babaye giingong way maayong pangisip.
Mga tawo sa dapit niingon nga ang babaye, kinsa dugay nang libudsuroy sa dapit, nakit-an sa mga alas 5:30 sa hapon sa Biyernes, Nobiyembre 20, nga nagsuroysuroy.
Matod ni Zozobrado nga nakit-an usab ang babaye nga nikanaug ngadto sa sapa nga lawom ug hayan sa kangitngit, nahulog ug nalumos.
Ang lawas gidala na sa usa ka punerarya sa lungsod sa Liloan ug i-autopsy sa kapulisan. (GPL)