SUGDAN sa Toronto Raptors ang NBA season sunod buwan sa Tampa, Florida tungod sa travel restrictions nga giimplementar sa Canadian government tungod sa pandemya.
Nagsige na og pangita ang Raptors og laing lugar sa mga niaging semana apil na ang Sunrise, Florida nga lugar sa NHL’s Florida Panthers.
Pero tungod sa NBA training camp nga ipahigayon sa mosunod nga duha ka semana ug ang pagsugod sa season karon nang Disyembre 23, 2020, napugos ang Raptors sa paghimo sa maong desisyon.
Moduwa sila sa Amalie Arena, lugar sa Stanley Cup champion sa Tampa Bay Lighting.
Matod sa opisyal nga pamilyar sa mga desisyon sa Canadian government sa interbyu sa The Associated Press nga grabe pa ang Covid-19 nga transmisyon sa United States para matugotan ang cross-border travel nga dili essential.
Ang maong opisyal, nga di magpangan ug dili awtorisado sa pag-estorya sa publiko sa maong sitwasyon, miingon nga adunay tsansa nga i-review ang maong desisyon sunod tuig.
Ang Raptors kinsa maoy nag-inusarang NBA team nga gikan sa Canada nagtinguha nga ma-exempted sa lagda nga tanang mosud sa Canada kinahanglan mopaubos sa 14-day quarantine.
Apan nagpabilin pang sirado ang U.S-Canada border para sa non-essential nga mga travel.
Matod ni Dr. Andrew Morris kinsa professor sa infectious diseases sa University of Toronto ug medical director sa Antimicrobial Stewardship Program sa Sinai-University Health Network nga sakto ang desisyon sa gobyerno sa Canada.
“With the current situation it is almost impossible for the government to reasonably sanction travel back and forth travel outside a bubble,” matod ni Morris.
Sa pagkakaron, ang Florida ang mamahimo una nga balay para sa Raptors.
Ang Toronto ang labing una nga NBA team nga naabot sa Florida niadtong summer para pagsugod sa mga preparasyon para sa pagsugod og balik sa season sa walt Disney World duol sa Orlando.
Ang Raptors nagsugod sa ilang training camp sa Florida Gulf Coast University sa Fort Myers ug sa wala pa sila niadto sa Disney human ang pila ka semana. (PAC)