HUMAN makalangkat sa iyang unang kampiyonato sa National Basketball Association (NBA) ubos sa Los Angeles Lakers, sa wala damha sa kadaghanan, mobalhin na ngadto sa laing team ang higanting sentro nga si Dwight Howard.
Ning higayona, ari na usab si Howard manimpalad sa Philadelphia Sixers isip backup ni Joel Imbiid sa kantidad nga $2.6 million sud sa usa ka tuig. Kini dakong sukwahi sa iyang unang gipadayag pinaagi sa twitter nga magpabilin siya sa Lakers.
Dinhi ko mibilib ni Daryl Morey, ang kanhi general manager sa Houston Rockets, sa iyang kapabilidad sa pagpang recruit og mga players kay tiaw mo bay iyang nausab ang plano ni Howard nga magpabilin sa Lakers.
Nakita man gud sa Sixers nga sa higayon nga papahuwayon nila si Embiid, walay makatapak sa ilawom nga bahin niini nga maoy daling mapahimuslan sa ilang kaatbang.
Ang kanhi sakop sa Orlando Magic nga Howard nakasinati og batig dagan sa iyang career sa NBA sa niaging pipila ka katuigan nga gani nalukop na siya og balhin-balhin og team.
Apan daw og sa mibalik sa pagsubang ang iyang karera sa dihang gikuha siya sa Lakers human ma-injured si DeMarcus Cousin. Ubos sa pagpangulo ni LeBron James nakapakita siya og maayong labok sa opensa ug depensa, nga maoy nagyawi nga nahatagan og katumanan ang iyang damgo nga makaangkon og titulo.
Pero bisan pa man niini, wa gihapon kini makapugong sa pagbalhin kaniya ngadto sa Sixers.
Ang paghiabot ni Howard sa kampo sa Phildelphia, nakapahimong title contender sa Sixers tungod kay nakuha man usab nila ang mga shooters nga sila si Danny Green ug Seth Curry.
Hinuon, dili makaparalisa sa Los Angeles ang pagkawagtang ni Howard kay nabira man sa Lakers ang batan-ong bigman sa LA Clippers nga si Montrezl Harrel ($19 million sud sa duha ka tuig). Sa niaging season si Harrell nag-average og 18.6 points, 7.1 rebounds ug 1.1 blocks sd sa 27.8 minutos.
Gawas ni Harrel, nakuha usab sa Lakers si Wes Matthews ($3.6 million sa usa ka tuig) ug Dennis Schroder sa Oklahoma City Thunder nga ilang gibaylo ni Danny Green.
Ning bag-o lang pag-abli sa free agency sa NBA, kon way kausaban sa dagan, wa hibintahai ang defending champion Lakers sa hinulbotay og players.
Wa pa man tuod opisyal nga mo-renew sa iyang kontrata si Anthony Davis apan gituohan nga mopirma kini sa uwahing bahin ning buwana.
Matod pa sa tinubdan, nga nagpaabot ni Davis sa lamesa sa Lakers ang $189 million nga kontrata sulod sa lima ka tuig. Pero duna usab kini plano ipahaom ang iyang kontrata sa kang LeBron James kinsa mahimo na usab nga unrestricted free agent sa 2021-2022 season.
Ang ako lang gianugonan kon dili makuha og balik sa Lakers ang beteranong pointguardd nga si Rajon Rondo ilabi na kay anaa na sa team si Schroder.
Si Rondo kinsa usa sa nakatabang og dako sa malampusong kampanya sa Lakers adunay $2.62 million ngaplayer option sa Lakers apan wa pa kini niya gamita ug naghuwat og laing team nga mokuha niya sa hataas nga presyo.
Sa pagkakaron, wala pay kisaw ang ubang team samtang nagpadayon pa ang mga negusasyon. Kini maoy atong atngan.
* * *
SABONG NI. Tungod kay wala pay go signal gikan sa Cebu City government, ang mga sakop sa Visayas Gamefowl Breeders’ Association (Vigba) adto mopahigayon sa ilang mga kalihukan sa laing local government unit.
Sigon sa gipahibawo ni Vigba president Jay Li pinaagi sa social media, karong Nobiyembre 29 (Dominggo) ang Vigba 8-Stag derby adto ipahigayon sa Compostela Cockpit Arena diin sundon ang 3-5 format.
Sa Disyembre 5, adto na usab kini sa Sibonga Orange Cockpit nga mosubay gihapon sa samang format. Kini adunay P6,600 nga pot money. Goodluck guys. (jun.migallen22@gmail.com)