WA NAY dagkong illegal drug players sa Dakbayan sa Talisay.
Base sa monitoring sa kapulisan sa dakbayan sa Talisay, ilang namatikdan nga wa nay dagkong players nga tigsuplayan sa dakbayan.
Matod ni Police Major Gerard Ace Pelare, hepe sa Talisay City Police Station nga kon hisgutan ang drugas, anaa pa gihapon apan ginagmay na lang nga mga player ang ilang madakpan.
“In our monitoring, wala na gyud ang organized drug syndicate. Kon naa man gani, small time players lang ni sila,” nagkanayon si Pelare.
Ang dakbayan sa Talisay kanunay mahisgutan ni Presidente Rodrigo Duterte gumikan sa kadaghang drugas sa siyudad. Gitumbok usab sa Presidente ang kanhi mga narco-politician sa siyudad, uban kanila patay na.
Dugang ni Pelare nga ang ilang kampanya batok ilegal nga drugas magpadayon hangtod malimpyohan na kini sa hingpit. (BBT)