KATABANG namatay samtang naangol ang iyang amo ug kauban human sila gi-ambush sa alas 5 sa kaadlawon sa Sabado sa Nobiyembre 21, 2020 sa Sitio Bolobogan, Barangay Basak, lungsod sa Badian.
Si Arlene Buenafe, 31, dunay kapuyo, taga Barangay Taytay, lungsod sa Badian dead on arrival (DOA) sa tambalanan.
Naangol ang iyang amo nga si Lolita Yong, 55, biyuda, taga Brgy. Poblacion, lungsod sa Badian, nagtrabaho sa Assessor’s Office sa ilang lungsod.
Lakip sa naangol ang higala niini nga si Gilbert Jorolan, 59, retired nurse, taga Brgy. Poblacion, Badian.
Nakalingkawas ang 16 anyos nga kaabag ni Jorolan kay wa naigo sa pagpamusil.
Si Buenafe samdan sa dughan ug milapos ang bala sa buko-buko hinungdan sa iyang kamatayon.
Si Yong samdan sa walang, bukton samtang Si Jorolan samdan sa tuong bukton nga milapos sa buko-buko.
Ang duha naa sa pribadong tambalanan sa dakbayan sa Sugbo.
Si Lt. Alexius S. Tangub, hepe sa Badian Police Station nga nahinabi sa Superbalita Cebu, nagkanayon nga ang mga biktima sakay sa traysikol nga gimaniho ni Jorolan.
Sa likod ni Jorolan naglingkod si Yong samtang pasahero nila ang tagsa-tagsa ka kaabag, si Buenafe ug ang 16 anyos.
Sumala pa ni Stangub nga sila si Yong padulong sa Brgy. Dobdob kay mag-jogging.
Kada buntag sila sa maong dapit moestambay kay bugnaw, unya overlooking.
Samtang nagsubida sila, naay nagsunod kanila nga motorsiklo. Pag-abot sa maong dapit, kalit silang gipamusil sa sakay.
Ang mga gunman paspas sab nga ningsibat human sa krimen. Ang 16 anyos nakadagan ug maoy nakapangayog panabang.
Ang kapulisan nakarekuber sa crime scene sa upat ka mga kabhang sa 9mm pistol ug duha ka mga bala nga wa pa makabuto.
Matod ni Stangub nga ila pang estoryahon ang mga survivor aron makakuhag dugang detalye sa ilang pagkatawo.
Ilang gisubay ang personal nga bangi isip motibo. (GPL)