USA ka pribado nga ospital ang gipasirado aron malikayan ang pagkuyanap sa Covid-19 sa lungsod sa Compostela, Davao de Oro.
Ang maong ospital mao ang AACUACOR Hospital nga nahimutang sa Poblacion, Compostela.
Matud pa nga temporaryong gipasirad-an sa lokal nga panggamhanan sa lungsod ang nahisgutang ospital sugod sa alas 12 sa tungang gabii, Sabado, Nobiyembre 21, 2020, gumikan sa bag-ong nagpositibo sa Covid-19.
Sumala pa ang mga nakaadto sa maong balay tambalanan niadtong Nobyembre 17, 18 ug 19, 2020, kinahanglan magpaminaw sa gibati sa lawas.
Sila ang nagpakonsulta sa out-patient department ug nasuta pinaagi sa contact tracing procedure nga nahimo niining direct contacts ang mga staff ug mga personahe sa ospital.
Sa pagsuwat ning maong balita, wa pa nipagawas og detalye kabahin sa pasyente ang lokal nga panggamhanan sa lungsod, apan gibutyag nga padayon ang gihimong contact tracing aron sa pag-ila sa uban pa niining nakasalamuha. (Dexter T. Visitacion)