PATAY ang usa ka opisyal sa Philippine National Police (PNP) sa pagpamusil alas 2 sa hapon, Sabado, Nobyembre 21, 2020, sa probinsya sa Maguindanao.
Giila ang biktima nga si Lieutenant Colonel Walter Annayo, 41, minyo, nadestino sa PNP sa Bangsamoro Autonomous Region in Muslim Mindanao (Barmm) Regional Office sa Regional Personnel Holding & Accounting Office sa Camp SK Pinatun Parang Maguindanao ug molupyo sa Baguio City.
Matud ni Maguindanao Police Provincial Director Colonel Donald Madamba nga nagsakay si Annayo sa iyang Toyota Fortuner nga dunay plaka GAL-2258 gikan sa Cotabato City pabalik na sa kampo sa PNP-Barmm.
Apan pag-abot niini sa Barangay Macabiso Sultan Mastura Maguindanao, minaog kini sa iyang sakyanan aron mopalit og buko juice daplin sa Narciso Ramos Highway.
Laing Toyota Fortuner kolor puti ang kalit mihunong uggipusil si Colonel Annayo gamit ang kalibre .45 nga pistola dungan sibat paingon sa direksiyon sa Parang Maguindanao.
Patay on the spot ang biktima nga naigo sa iyang ulo ug likod nga parte sa lawas.
Si Annayo maoy hepe sa kapulisan sa Jolo, Sulu atol nga natigayon ang pagpamusil-patay sa mga intelligence operatives sa militar sa iyang mga sakop.
Sa kasamtangan, blangko pa ang Sultan Mastura PNP sa motibo sa pagpamusil-patay sa biktima ug padayon pa silang nag-imbestiga. (Edgar Fuerzas)