SUPERBALITA CEBU

Moestrikto sa utlanan

St. Catherine of Alexandria Church

TALIWALA sa hulga sa coronavirus disease (Covid-19), gitugotan gihapon sa kagamhanan sa dakbayan sa Carcar ang pagbisita sa mga deboto sa patron nga si St. Catherine of Alexandria sa Nobiyembre 24 ug 25 kon kini makapakita og health certificate gikan sa tagsatagsa niini ka local government unit (LGU) sa border checkpoint sa siyudad.

Miluag ang ultanan sa lalawigan human sa pagpaubos sa modified general community quarantine (MGCQ) apan ang Carcar moestrikto sa ilang utlanan atol sa kapisthan sa dakbayan.

Subay sa Executive Order (EO) 101 nga giluwatan ni Carcar City Mayor Mercedita Apura, gi-pahibawo niini nga kanselado ang tinuig nga pagsaulog sa Kabkaban Festival.

Pasabot nga wala usa’y mga kalingawan nga ipahigayon.

Hinuon, magpadayon ang mga relihiyusong kalihukan sa siyudad apan kutob lang sa pagpahigayon og misa.

Atol sa misa, limitahan sa 50 porsyento lang ang kapasidad sa makatambong sulod sa simbahan. May 25 hinuon ka mga sobrang lingkuranan nga ipahimutang gawas sa simbahan aron masiguro nga makatuman sa physical distancing.

Ang tanan nga deboto gi did-an usab sa paghalok sa imahen, pag pahid sa panyo bisan pa ang paghikap niini.

Aron masiguro nga dili mahimong hinungdan sa paghuot sa palibot sa simbahan, kinahanglan nga mo distansya og 100 metros pa layo sa simbahan ang mga naninda.

Sa maong higayon, limitado usab sa 200 lang ka mga kustomer ang mahimong mosulod sa malls ug supermarkets. Kinahanglan usab nga magsul-ob og face mask ug face shield.

Pahimangno alang sa mga gustong mag sadya gisaysay usab sa kamandoan ni Apura nga “Videoke, drinking of alcoholic beverages in public view shall be prohibited during the fiesta celebration.”

Subay sa uwahing datos sa mga nataptan sa Covid-19 sa siyudad sa Nobiyembre 20, aduna pay siyam ka mga kaso nga padayong gimonitor ang siyudad.

Hinuon 220 na ang naayo sa kinatibuk-an nga ihap nga niabot sa 248 ka mga kaso.

Gipasabot sa dakbayan nga kining tanan nga lagda gibuhat paagi nga malikayan ang pagsulbong unya sa mga mataptan sa kagaw.

Padayon nga pahimangno sa kagamhanan sa mga mobisita sa siyudad nga dili mokumpyansa ug sigurohon nga matuman ang health protocols aron mopauli nga luwas sa sakit.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph