Colon night market ibalik?

NAGSUMITER ang Cebu City Market Operations Division sa ilang proposal para sa pagbalik sa operasyon sa night market bisan pa man sa coronavirus disease 2019 (Covid-19) nga pandemiya.

Matod ni City Market Officer Irvin Cabales, anaa na sa opisina ni Mayor Edgardo Labella ang ilang proposal ug kuwang nalang kini og pirma sa mayor.

Kon mapirmhan na ni Labella ang maong proposal, makabalik ang operasyon sa night market sa Disyembre puhon hangtud sa Marso.

Matod ni Cabales, 300 ka mga manindahay lang ang mamahimo nga patindahon sa night market aron masiguro nga maimplementar ang health protocols.

Atol na unya sa operasyon, isip pagsunod sa health protocols, iimplementar ang one-meter distance sa matag stall; kinahanglan ang pagsul-ob sa face mask ug face shield; ug kinahanglan adunay hand sanitizer o alcohol ang matag tindera para sa kustomers.

Iimplementar sab ang one entrance ug one exit policy sa lugar.

Di pareha sa mga niagi nga tuig nga alas 12 sa kaadlawon manirado ang night market, karon kay upat ka oras lang pag-abli niini, gikan sa alas sayis sa gabii hangtud sa alas diyes.

Matod ni Cabales, makatabang ang night market aron makapamawi og ginagmay ang mga manindahay nga pila na ka buwan nga nahunong sa ilang panginabuhian.

Sa mga miagi nga tuig, ang night market ang dagsaon sa mga tawo nga buot mopalit alang sa pasko ug alang usab sa Sinulog.

Anaa makita sa night market ang nagkalain laing paninda sama sa sapatos, Sinulog shirts, gamit para sa cellphone, ukay-ukay, ug lain-lain nga street food.

Nakahatag sad kini og kinabuhi sa dan Colon sa mga niagi nga tuig.

Matod ni Cabales iya na sab gikonsulta si Ian Kenneth Lucero, direktor sa Department of the Interior and Local Government (DILG) sa Cebu City.

Base sa iyang pakighinabi ni Lucero, niingon si Cabales nga way labot ang night market sa memorandum sa DILG nga nagdirekta sa local government units nga magpahigayon og road clearing. (JJL)