ORMOC CITY, Leyte - Duha ang patay samtang usa ang samdan sa nahitabong pagpamusil sa Barangay Mabini, dakbayan sa Ormoc.
Ang pagpamusil nahitabo sa Sitio Lanyog, Barangay Mabini, Ormoc City, pasado alas 7 sa gabii, Sabado, Nobiyembre 21, 2020.
Giila ang mga namatay nga sila si Rizalina Cañete, 29, minyo ug Redford Judilla, 31, security guard samtang, ang naangol mao si Ma. Theresa Teves, 37, minyo, pulos mga residente sa naasoy nga lugar.
Ang kapulisan sa Police Station 1 nakadawat og tawag bahin sa maong insidente.
Miresponde sa lugar ang kapulisan pinangulohan ni Police Staff Sergeant Jemelito Ignacio.
Naabtan sa mga pulis ang mga biktima ug gideklarar nga dead-on-the-spot si Rizalina samtang, gidala sa tambalanan sila si Redford ug Theresa apan taudtaod lang namatay si Redford.
Matod ni Police Colonel Ramil Ramirez, wala pa sila’y naestablisar nga motibo sa krimen.
Sigon ni Kevin Lloyd Alinsub, igsuon sa duha nga namatay, nagandam og sud-an ang iyang mga igsuon kauban ang iyang iyaan nga si Theresa atol sa hitabo. (JKDP)