SUPERBALITA CEBU

Editoryal: Duguong kampanya?

Editorial Art by Ariel Itumay

DALAYGON ang hugot nga kampanya sa kagamhanan batok sa gidiling drugas, nailang dangan sa katilingban. Nagdaut sa maayong paminsar hinungdan nga mangilngig nga krimen sa nasod.

Apan, dili usab maayong tugbangan sa linuog nga pwersa, sumala sa daghang alegasyon, bahin sa gipangpatay nga suspek sa durugista ug mga tigpayuhot og gidiling drugas.

Sagad sa rason nga misukol sa awtoridad hinungdan nga gibawsan ug napatay. Hinuon, dunay higayon nga tinuod kini nga sitwasyon apan nabaniog usab ang summary killings.

Ang pagkatudlo sa kanhi direktor sa Police Regional Office (PRO) 7, Police General Debold Sinas, isip ika-25 nga PNP chief, nagdala og dakong pasidaan sa nalambigit sa gidiling drugas.

Giangkon ni Sinas nga ‘my journey in reaching the chief PNP it really started in Cebu.’ Kon balikan nato sa pagtan-aw, panahon ni Sinas sa PRO7 nga daghang patay sa gidudahang nalambigit sa drugas sa Central Visayas labina sa Sugbo.

Mao kaha usab kini ang mahitabo sa nasod sa umaabot nga adlaw?

Matod ni Sinas, atol sa iyang pagbisita sa Sugbo niadtong Biyernes, Nobiyembre 20, dinhi sa Sugbo, naumol ang iyang mga programa nga mao usab ang iyang gipatuman sa tibuok nasod hinungdan sa kabalaka.

Bisan tuod nga dangan sa katilingban ang gidiling druga, apan ang mga nagpayuhot niini angay nga mangatubang sa hukmanan aron mosilot kanila, dili lakturon ang proseso sa hustisya sa nasod nga nagpatigbabaw sa demokrasya.

Hinuon, nindot ang pipila sa mga programa ni Sinas nga transparency sa pagdumala sa PNP labina sa panalapi ug paglimpiyo sa ilang han-ay sa mga buluyagong sakop labi na kadtong nalambigit o nagsilbing protektor sa mga sindikato.

Hinaut kita nga dili unta duguon ang kampanya ni Sinas batok sa gidiling druga sa nasod apan, angay lang kini masumpo.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!