ANG mga lokal nga kagamhanan mahimo nang motugot sa mga menor de edad nga nag-edad og ubos sa 15 anyos ug mga senior citizens nga labaw sa 65 anyos nga makabiyahe alang sa katuyoan sa turismo sa mga dapit nga ubos sa modified general community quarantine (MGCQ).
Mao kini ang pamahayag sa Malacañang niadtong Biyernes, Nobiyembre 20, 2020, human lugaki sa Inter-Agency Task Force for the Management of Emerging Infectious Diseases (IATF-MEID) ang age restrictions sa turismo nga gilabhagan sa gipatuman nga mga kurintinas tungod sa Covid-19.
Apan mag-agad pa kini sa mga lagda nga pagaluwatan sa local government units (LGUs), Department of Tourism (DOT), Department of Health (DOH) ug Department of the Interior and Local Government (DILG).
Si Cebu Gov. Gwendolyn Garcia, nga nibukas pagbalik sa turismo sa Sugbo niadto pang Agusto, nihangop sa maong kalamboan. Gusto niyang makabangon ang turismo sa Sugbo nga napiang tungod sa mga kurintinas nga gipatuman sugod sa unang quarter sa 2020.
Unang gipatuman sa Sugbo ang enhanced community quarantine (ECQ), dayon modified ECQ, general community quarantine (GCQ) ug modified GCQ. Ang Cebu City niadtong Hulyo gibalik sa MECQ.
Ang uban nakuyawan nga mahimo kining BBQ, balik-balik quarantine.
Gipasalamatan ni Gov. Gwen ang IATF sa ilang desisyon. Matod pa niya, “We thank the IATF for affirming our position. This will be a much-needed boost to the country’s tourism industry and the economy.”
Samtang nitumaw karon ang kabalaka nga mosaka ang mga kaso sa Covid-19 tungod sa pagbalik pagdagan sa dugang public utility vehicles (PUVs), lakip na sa traditional public utility jeepneys (TPUJs).
Sa siyudad sa Sugbo, 19 ka mga TPUJs ang gitugotan sa pagbiyahe pagbalik niadtong Biyernes, Nov. 21, 2020. Apan unsaon man pagpugong sa pagkatap sa Covid-19 pinaagi sa mga PUVs?