SUPERBALITA CEBU

Nadela: Paglambo sa trapiko atong kaakohan

Asoy Ni

YAWYAW didto, yawyaw diri. Mga netizen nagbawosbawos pagpadayag sa ilang disgusto sa higayon nga matanggong sa bul-og sa trapiko.

Ang dali nga balikason mao ang tinugyanan sa trapiko kay kuno mga inutil ug nagmika sa ilang trabaho. Makalingaw basahon ang ilang mga post kay lage personal nga kasinatian nga may pakapin pa nga hulagway sa nagsinardinas nga mga sakyanan.

Manggawas dayon ang mga komentaryo nga naghisgut sa ka bulok sa sistema o mga pamaagi nga gipatuman. Mga expert maghisgut og solusyon.

Duna man tay gitawag og freedeom of expression mao nga go nalang bisan kong ang ubang giyawyaw wa gyuy igong basihanan.

Ambot sab ning ubang ahensiya nga gitahasan sa pagpangita og sulbad kutob ra man gyud sa pagpawarawara sa mga kamot sa ilang mga traffic enforcer.

Kuhai og basi ang may north road sa dakbayan sa Mandaue lahos sa lungsod sa Consolacion.

Sa wa pay Covid-19, ang problema sa trapiko sa maong dapit way sama bisan giunsa og sulbad, samang salida ang atong nasaksihan. Abi ko og wa nay kasulbaran sama sa Edsa sa Metro Manila. Nag-ilis ilis nalang og administrasyon nagpabiling labad sa ulo sa mga motorista og pasahero kining dapita. Pero wa damha nikalit og kamingaw ang maong karsada.

Dili ra diay pagtimaan sa semana santa ang makapamingaw ug makasulbad sa problema. Tinuod kana. Ang Covid-19 nga nagdala og lockdown nakapausab sa pamayhon sa tanang karsada sa tibuok kalibutan.

Sa laktod nahanaw ang nagsinardinas nga mga sakyanan nga nakahasol sa inadlaw natong kalihukan.

Apan sa dihang gitugotan na ang pagbiyahe sa mga pasaheroan ug nakagawas ang mas daghang pribadong sakyanan, nabalik na sab ang problema. Wala pa gani maapil dinhi ang mga school bus ug ubang sakyanan nga maghakot sa mga tinun-an kay lage wa naman sila motunga sa ilang tagsatagsa ka eskwelahan.

Niadtong panahon nga mingaw pa ang karsada, wa diay sila maghimo sa ilang homework agi og pangandam nga mobalik na ang mga biyahe? Nganong nagkalandrakas naman sab ug nagkulismaot ang mga nawong sa motorista ug pasahero?

Luyo ning tanan, mangutana ta sa atong kaugalingon. Unsa may atong natampo aron maminosminosan ang problema sa trapiko? Kutob ra ba ta sa pagpamantay sa uban nga wa magtuman sa mga lagda sa trapiko?

Basin baya apil ta sa problema. Kuhai og basi ang kalit nga paghuot sa bul-og sa trapiko sa may eskian South Coastal Road ug ang karsada padung sa Pooc sa siyudad sa Talisay.

Ang traffic light naghatag na og pasidaan nga ang mga sakyanan nga mosud alang sa Pooc mohunong na kay turno na sab alang sa mga sakyanan nga nagsubay sa South Coastal para Cebu City. Apan di makalusot kay nibabag ang laing sakyanan sa tunga sa karsada.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph