SOBRA siyam na ka bulan nga nag-lockdown ang nasud tungod sa Covid-19 pandemic. Daghan pang nasud ang wa pa makabangon sa dakong epekto niini sa panglawas, ekonomiya ug sa sosyal nga kahimtang.
Padayon ang pagtaas sa ihap sa natakdan apil na ang namatay apan medyo di na kini kusog kaayo susama sa niaging mga bulan.
Nahimong first five kanunay ang Davao sa gidaghanon sa natakdan mao nga gideklara na nga "restricted LGU" ang dakbayan ug gipailawom kini'g balik sa "General Community Quarantine" diin naa na say limitasyon sa paglihok sa katawhan ilabi na sa mga senior citizens, mga kabataan ug kadtong adunay sakit nang daan.
Si Presidente Rodrigo Duterte mismo ang nag-anunsyo nga ibalik kini sa GCQ kay sama kaniadto sa Cebu City, daghan daw'ng buluyagon ug gahi og ulo nga Dabawenyo. Hinuon dili nato sila mabasol tungod kay sa pagkatinuod, kita ra usab ang nagdala'g tigaw nganong nidaghan ang natakdan.
May kaila ako sa usa ka non-government organization diin sa 17 nila ka trabahante, tulo ang positibo sa virus. Ang usa kanila kay anaa na karon sa SPMC tungod sa dili masabot nga ubo samtang ang iyang asawa nga buntis ug anak nga gamay pa kay positibo sab.
Wa nila mahibaw-i kung asa nila nakuha ang virus tungod kay talagsa ra sila mogawas ug kanunay nagsunod sa "minimum health protocols" nga girekomenda sa Department of Health. Ang pipila sab ka benepisaryo nga kabataan sa maong NGO kay natakdan apan wala sila masulod sa hospital kay mga asymptomatic.
Ang nakaparat kay adunay hubak ug taas ang "sugar level" sa akong kaila. Hinuon nakadawat ako ug text gikan kaniya nga medyo okay na daw siya human siya gi-oxygen kay lisod i-ginhawa. Nangayo siya'g electric stove nga iyang initan og tubig kay kanunay sayang uhawon.
Gibalik sab sa Davao City ang paggamit og Food and Medicine (FM) Pass ug ang curfew gikan sa alas 9 sa gabii hangtod sa 4 sa buntag. Maayo na lang ni kaysa alas 7 sa gabii sa una nga grabe ka piut.
Mao kini ang hulagway sa atong dakbayan karon apan may maayong balita nga atong nabatian gikan sa kaulohan kay gibalita nga mopalit na ang atong gobyerno og bakuna sa pagsumpo sa sakit. Dili lang usa ka bakuna kung dili upat o lima ka bakuna ang naglumbaanay karon og testing nga makaayo sa sakit.
Anaay niingon kay 92% kini ka epektibo, samtang may kompanya nga nag-ingon nga 95% samtang ang uban kay 98%. Ambot kaha kung kinsay tinuod? Kumusta kaha ang atong "virgin coconut oil" nga giestudyohan karon sa Department of Science and Technology? Ang kadtong Fabunan Anti-virus Drugs? May resulta na ba sa ilang pagtuon sa Pinoy nga tambal sa sakit?
Dako ra ba kaayo ang budget nga gialokar sa gobyerno alang niini. Kung wa ko masayop, mokabat og P11 bilyon ang budget sa pagpalit sa bakuna nga gikan sa America, Russia, China o Europe. Morag duda ko nga negosyo man diay ning Covid-19 no? Human sa kasakit, naay nalipay nga kumpanya. Pastilan!